中環在線：劉鳴煒VS劉今晨
堂兄弟Package邊個筍？
■細劉劉鑾鴻（右）同兒子劉今晨（中）和女兒劉今蟾（左）股東會後見記者。 王心義攝 華置（127）主席劉鳴煒出名有個靚package，佢有位堂細佬劉今晨，一樣係後生靚仔富二代，
仲要未婚。一對堂兄弟，邊個package正？
華置大股東劉鑾雄（大劉）與利福（1212）大股東劉鑾鴻（細劉）呢兩兄弟，虎父無犬子，兩位劉公子都已經幫家族企業各展所長。
細劉位公子劉今晨舊年進修完畢，今年3月正式出任利福地產（2183）執董，噚日首次父子同場現身股東會。佢臨開會先至同家姐劉今蟾（利福執董）一齊出現，急急腳入場，會後一家人企定定影相，可能因為第一次見記者，佢全程都冇答過問題。
劉今晨讀藝術史
老實講，單憑外表，好難評論劉鳴煒定係劉今晨個package好啲，何況後者都冇開聲，真係唔知佢有幾多斤両。劉鳴煒就算有package，都俾人話佢堅離地。惟有市儈兼膚淺咁比拼二人背景喇。
劉鳴煒旗下華置最新市值375億元；劉今晨計埋利福系兩間上市公司，都係180億元，坐正做執董嘅利福地產只得8.3億元市值，佢哋可能跌都跌咗。
講學歷呢，劉鳴煒係倫敦King"s College法律學士、LSE法律碩士、再返母校King"s得到法律哲學博士學位，仲係紐約州註冊律師，同特許財務分析師（CFA）特許持有人。
劉今晨就走藝術風，喺紐約Columbia U讀藝術歷史、再喺NYU讀文學碩士。要揀，真係各適其適。
花生友當然最關心兩位係咪available喇，劉鳴煒離過婚、有女友，有4名子女，女伴應該冇生育壓力。劉今晨只得27歲，肯定單身，大家喺gym房、酒吧、畫廊之類嘅蒲點見到佢，記得打招呼呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com