油股有運
2016/04/19 08:54:27
網誌分類: 經濟
周日舉行的多哈會議「食白果」，紐約期油即時插超過6.5%至大約每桶38美元。
本來預計油價大跌將拖累能源股，會令到股市受壓。不過，路透社報導科威特因為發生有史以來最大的石油工人大罷工，估計科威特的石油生產及煉油量會否由每日300
萬桶大幅降低至110萬桶，抵消了市場對於石油生產國凍產不成所帶來的衝擊，紐約期油周一反彈上接近40美元水平。能源股顯著造好，杜瓊斯能源指數升1.6%，其中Chevron升1.5%，係表現最好的杜指成份股，成為推動大市向上的主要動力。油股真係有運。
杜指昨日升107點，收市重上萬八點大關，報18004點，標普500指數升14點，收報2094點，升幅都同樣係0.6%；納指升22點至4960點，升幅0.4%。
正如Convergex的交易部門主管Peter Coleman表示，雖然油價係影響的主要因素，但今個星期，市場比較關注美企盈利表現。他認為只要美國油價能夠企穩每桶35美元樓上，就唔會對大市造成好大的拖累。
Continental Resources的創辦人Hamm亦認為，市場可以忘掉凍產會議，因為隨著美國油井的數量大幅減少，目前已經減少77%，石油的供應及需求在兩、三個月就會回復平衡，又預期紐約油價年底會反彈至每桶60美元。
不過，有唔少分析質疑呢種樂觀睇法。CNBC的記者就表示，當投資在新油井的資金因油價大跌而大幅減少，但石油仍然不斷地從油田中泵出，總產量已經較前一年的高峰下降了6%，現時油價大約每桶40美元，與2014年中的高峰已大跌超過一半，但產油商仍然不斷泵油。
過往，石油過剩，好多產油國，例如沙特，都會減低產量去推高油價，但自從多咗美國同加拿大的競爭，沙特不單不減產，反而要增產，希望用壓低油價去趕競爭對手出市場。主要產油國最近提出將產量凍結在1月時高峰，其實就係見到油價已經跌到北美產油商都死得夠慘，威脅性唔大啦。不過，最終會議都係達唔成任何協議。
事實上，即使油價跌得咁低，大部份的美國油商都無興趣減產，有分析指出，油商決定停止泵油，唔係話油價低就會減產咁簡單。首先，每個油井的生產成本都唔同，主要睇早期搵油井的成本及以後來租用工具、運作及維修成本。例如，美國最近有些已經停產的油井，因為有高新技術的幫助而再度投產，呢種油井的開採成本低好多，油價低都可以有錢賺。
另外，對於某些生產商，閉關及重開油井，成本非常之高，所以惟有繼續泵油，將石油儲存起來，等待油價日後回升。所以，依家全球的儲存設備，基本上畀石油商覇曬，單係美國石油存量較油價高峰期時高出20%，係5年以來最高。
雪上加霜的是生產沒有減少的同時，全球的消耗量卻不斷收縮，其中一個原因係中國以至大部份的發展中國家的經濟都在放慢。目前，除了一些加拿大高成本比較的油沙及岸上油田、以及一些老舊的美國、英國岸上油井及北海的油井，因油價前景未明朗，衝所以會決定關閉以外，全球都有增加產量，除咗全球最大及第二大產油國沙特及伊拉克正在提高產量以外，第三大產油國伊朗的也在大力追回經濟制裁之前的出口量。可見油價中短期內都好難會有好表現。
陸羽仁
回應(1) 我想回應
陸羽仁 BLOG 舊文
來源 source: http://blogcity.me