操盤手劄記：波鞋股回氣再跑
3個月前嘅今日，被美息搞到冇覺好瞓，仲要打醒精神應戰期指結算。今日仲有日央行議息，上周已放風考慮以負利率向銀行提供貸款，即銀行向央行借錢，唔使畀利息兼有補貼收，藉此誘使銀行放貸。咁有創意嘅新招，要見識下！
議息結果揭盅前，市場觀望氣氛濃厚，加上五一長假
期在即，投資者唔敢輕舉妄動。港股昨日回吐45點，收21361，成交縮至549億元。中外傳統智慧都睇淡5月，又話五窮六絕，又話sell in May and go away。事實上，過去25年，亞太股市5月確係難逃一跌，MSCI亞太指數5月平均下跌0.7%，但中國、印尼及菲律賓就例外，分別平均上升6.9%、2.5%及2.4%。今年又點？要睇美日議息結果！
MSCI今個月開始新一輪市場諮詢，6月公佈決定。雖然2014年、2015年兩輪市場諮詢都決定暫時唔納入A股，但預咗遲早受佢玩。官媒《中國證券報》前日就率先為A股打氣，頭版刊出文章指A股納入MSCI條件已成熟；高盛則認為機會五五波，強調政策仍然係A股「入摩」嘅主要障礙，例如停牌機制、資本調出限制等。我當然想A股「入摩」成事啦，A股好，港股好嘛！
安踏表現跑贏同業
面對中國經濟持續放緩，阿爺奉行「促消費、保增長」策略，內需概念股有運行，尤其體育用品股，皆因阿爺將體育產業作為拉動消費嘅重要一環，有多方面政策扶持。呢個零月，波鞋股361度（1361）、特步（1368）、匹克（1968）、安踏（2020）等，又輪流起跑。
一眾波鞋股中，我比較鍾意安踏，話曬規模有番咁上下，而且2014年起成為NBA中國官方市場合作夥伴及授權商，喺內地籃球市場居於領導地位；2015年又發佈足球戰略，多瓣生意。2016年第三季度訂貨會早前結束，安踏定單金額，按批發價值計，按年錄得高單位數增幅，係自2014年第一季度起，連續11個季度錄得定單增長，反映集團經營持續向好。
安踏近兩年業績恢復兩成以上穩定增長，作為行業龍頭，兼具規模優勢及賺錢能力，財務比率較同業好，股本回報率（ROE）達23.8%，相對361度、特步、匹克分別為9.8%、12.8%、8%，跑贏成條街。睇走勢圖，安踏呈現區域上軌突破利好訊號，昨收20.9元，升1.7%，料將回氣，唞順再上，可待20元附近入貨。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com