翠如劃界妖股照癲
2016年04月21日
美股繼續升，但弱勢嘅A股已經無氣，上證綜指3000點關再度跌穿，單日跌2.3%，搞到港股再插。但由於A股尾市好似稍有維穩力量，跌幅略為收窄，港股都守番個勢。
外資看淡內銀
內地上星期出完一輪「利好」數據後，呢兩日無乜好消
息出台，內地股市於是掉頭下插。中資電訊股午前沽壓重，拖累港股瀉逾300點，內地創業板指數大跌5%，追蹤內地創業板指數的南方中創業板(3147) 亦捱沽。尾市時段，A股金融股見有護盤，好似工行A股抽番上去變無升跌收場，中石油A股跌0.8%，滬指跌幅收窄。上證指數最後收報2972點，跌70點。深成指收報10164點，跌437點。創業板收報2145點，下跌127點。即使疑護盤，內地除巨股外所有板塊全線大跌，差不多將一個月升幅全部報銷。
有分析指內地個市升得咁上下，外資開始出貨鎖定利潤或套現。老外好明顯係關注內地金融業問題，摩根士丹利見匯控(005) 使出回購一招托價，就反攻再出口術唱淡香港銀行隨時醞釀完美風暴。
羅兵咸永道發表亦研究報告指，中國經濟放緩及利率市場化環境下，內地商業銀行盈利已見頂。報告分析咗18間上市的內地銀行去年業績，顯示平均淨利潤增長由2014年的7.4%，下降至2015年的1.9%。呢118間銀行總資產達111.08萬億元人民幣，按年增長12.1%，不良貸款額亦增加48.6%，至9482.8億元人民幣。另外，去年逾期貸款額按年增加約45.7%。羅兵咸永道指，除不良貸款外，逾期貸款亦顯著增加，擔心資產質量風險正不斷增加。
A股受壓下，港股最多跌333點，其後港股跟隨內地收復部份失地，恒指全日跌199點，收報21236點；國企指數收報9134點，下滑110點，成交732億元。
浙江為降低企業成本，計劃降燃氣價格，德銀認為上述政策對燃氣股屬負面消息，多隻燃氣股遭拋售。新奧能源(2688) 、中國燃氣(384) 急跌11%；華潤燃氣(1193) 挫8%，港華燃氣(1083) 挫5.6%，其母公司煤氣(003) 都跌3%，報14.6元，跑輸一眾藍籌股。
呢個星期八卦雜誌必講話題之一，仍然係「翠如BB股」。翠如BB阿爸控股的聯旺(8217) 上市後大炒，呢隻港產創版妖股呢個星期雖然唔再喪升，但佢嘅神話仍然令人嘖嘖稱奇。
黄翠如因為爸爸係股東，同聯旺(8217) 拉上關係，陸羽仁形容過係「翠如雖不殺伯仁、伯仁卻為翠如而死」，雖然佢無走去炒作掠水，但因為翠如BB的知名度，容易吸引咗散戶注意力，增加咗呢隻股嘅妖力，引到更多無炒開的散戶落場，幕後莊家自然更易掠水。
翠如BB唔知係唔係都睇到勢色唔對，蒲頭出嚟話好內疚，擔心自己嘅知名度會幫咗炒家。佢話，自己對炒股乜都唔識，曾經買過一次股蝕清光，聯旺掛牌嗰日諗住同老竇贈吓興，喺社交媒體貼張相上去，點知跟住就起哄，自己個名仲同公司掛咗掛鈎㖭。佢唔知咁樣係咪會幫咗炒家，所以掛牌後唔肯再講嘢，怕驚幫咗炒家宣傳。
翠如BB話，老竇係做建築，日日返地盤，根本唔識金融，亦都賣唔到股。翠如BB咁講好明顯係想劃清界線，撇咗同呢隻妖股嘅關係。唔知係咪知道女主角出嚟示警，聯旺昨日股價頂到好行，逆市漲咗8%，收報8.7元，最高仲升過去9.4元，力保百億市值不破。
急跌撈貨隨時中招
翠如BB高調切割，驚妖股害人累埋自己。我唔怕長氣再講，像聯旺這類喪炒股，主要分兩波殺人。第一波是股價衝高的時候，散戶追入，股價回落時便鎖死在高位附近。第二波殺人卻正正是在股價下插後反彈之時，好多「聰明人」守在缸邊等股價「急跌」之後撈貨，結果就咁衰喺第二輪絕殺之下。家翠如BB大聲疾呼叫人小心炒家，但我相信仲有好多人係唔會聽，呢啲炒高大插專收博反彈嘅叻仔，永遠都有人上釣，正如人人都知十賭九騙，但永遠都有人輸身家一樣。
陸羽仁
金融High Tea 舊文
來源 source: http://hdfin.stheadline.com