收市閒情：「權威人士」是如何煉成的
■《人民日報》拋低一句：「中國經濟是L型」。 資料圖片
《人民日報》拋低一句：「中國經濟是L型」，大佬！「L」呀！呢個字母一聽就覺得霸氣外露吧，仲要出自「權威人士」把口，即係話未來經濟平過水平線，反正阿爺信了。
「權威人士」係乜水先？Come o
n！咁執著做乜？係習近平又好，真正身份係一個研究生又好，簡單講，總之呢個人，就係《人民日報》苦心經營，捧紅出來嘅KOL（Key Opinion Leader）。
從今以後，一個中國，只有一個經濟分析師，就係叫「權威人士」！至於「權威人士」呢個KOL嘅權威，明顯係由三招煉成：
一、神秘如葉朗程
孟子曰，八卦之心，人皆有之。一個人，竟然可以隱姓埋名情況下，喺《人民日報》呢份中共最核心嘅喉舌平台，一年出現三次，仲要喺頭版出現，呢個人本來已神秘過百慕達。你零資訊都仲好，佢最賤係畀你知少少又唔知曬。
上年《人民日報海外版》，就透過微信公號，瘋狂引導暗示明示你，「權威人士」等如習近平。情況就好似葉朗程咁，你從來都唔知佢係邊個，但出面有時就傳佢係一個人，有人就傳佢係集體創作。
葉朗程就同「權威人士」一樣，哥只是傳說。傳說有乜好？傳說吸引啲囉！
二、有性格 有個人色彩
KOL最緊要係乜？要有性格！你睇健吾、睇司徒夾帶，甚至睇我，都好有個人色彩啦。如果你有睇成篇報道，你就發現呢個「權威人士」度金句、懶風趣，乜嘢「樹不能長上天」、「不搞半夜雞叫」、「風水輪流到我家」。
最勁喺佢成個訪問，不停「我我我」，乜嘢「我要強調的是」、「依我看」，仲講埋啲個人感受，「只要我們勇於面對，主動應對，不掩蓋和拖延風險，結果就沒那麼可怕」。
幾咁肉麻骨痹，好似真係有個人，拍住你膊頭講「Brother, I know that feel」，咁親切，咁有人味，當然會紅。
三、銀河唯一中國經濟分析師
最後一點，亦係最重要一點，早兩日先有新聞講，中央下令經濟師不准睇淡中國，山西省，擦鞋擦到天花板，只可以讚「以股代債」。咁即係話，中國經濟師已經被中央盡斷經脈，廢曬武功，以後佢哋嘅分析冇人信。
呢個時候，「權威人士」就出嚟話唱淡，即係話以後經濟分析只有一把聲音，就係「權威人士」。
簡單講，「權威人士」都只係一個包裝，你覺得佢係邊個都好，總之你要聽！不過，唔好忘記，「4000點是牛市起點」呢句說話，都係來自《人民日報》。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com