短炒要諗縮數
2016年05月11日
內地限制借殼回歸A股，令海外上市的中國概念股受壓，A股昨日一開插水，港股隨之受累，但跟住見到內地有護盤行動，中字股獲挺向上，上證綜指掉頭向上之餘，帶動港股回穩。
通脹數據不敵權威人士
內地股市雖然守住2800點，打個和升1點收場，唯獨成交
不足，暫時唔敢講係咪已經搵到支持，畢竟內地經濟同金融市場都比較反覆，港股又五行欠水，就算有個股造好，都係「乾炒牛河」格局。
開市前，內地公佈通脹數據，4月CPI同去年比上漲2.3%，同上月環比下降0.2%，預期2.3%，和預期相符，連續3個月超2%。中國4月PPI比預期好，同去年比-3.4%，同上月環比上升0.7%，預期是-3.7%，雖然按年連續50個月下滑，但按月計跌幅收窄中，特別係石油、礦石等商品價格回升。
官方解讀的4月CPI數據，豬肉和鮮菜價格同比漲幅依然較高，不過市場覺得整體數據表現穩定，加上PPI表現幾好，若然沒有中央「權威人士」解讀經濟唱淡在前，A股或者會炒一炒。但由於權威人士叫咗大家要做好面對L形經濟的準備，加上限制借殼措施的陰影，內地股市一開插得都幾勁，通脹數據已經變相「散功」。
瑞信將權威人士理解為是國家主席習近平，認為文章是出自其智囊劉鶴，料短期內政策會有轉變，包括貨幣寬鬆政策步伐放緩、暫停樓市政策刺激及可能推出的「債轉股」規模亦有限，中央會減少干預金融市場。
佢仲話，自2015年以來，權威人士曾經三度透過官媒談論中國經濟及改革。對上兩次A股均向下，去年5月發表文章後，上證綜合指數即遇上股災，兩個月內暴跌逾2200點。
經濟基本功唔發揮作用，好彩係內地乾夾個市上番去。上證指數收報2832點，微微漲0.48點，拉動番港股上升，恒指收報20242，升85點；六連跌嘅國企指數收報8486點，漲35點；但紅籌指數收報3551點，仍跌17點，成交只有598億元。
港股呢排好似天氣一樣咁唔穩定，一時話黃雨，一時話紅雨，投資者好多都忍手唔耐。小注怡情的目標，部份係有資產同派息的股份，昨日永義實業(616) 就炒有人狙擊，爆升咗34.6%，收市報0.305元。
如果秤身家，永義市值只是3.5億，無錯係資產雄厚大超值，但同一時間佢亦不時有抽水癮。過去佢已經炒過有人狙擊呢個概念，最後都由於大股東官永義持有足夠控股權，而不了了之，所以高追佢差唔多等如係博一鋪。
炒抽水股要留神
喺家咁靜嘅市，就算短炒都要計下縮數，諗定退路。如果要炒呢類資產股，有人寧願揀啲有派息股份，貪佢有乜「依郁」都有得守，會穩陣啲。呢幾個月安全倉(237) 、爪哇(251) 呢幾隻冷門收租股炒起咗，呢排輪到隻彩星集團(635) 陰陰升，而且都有番少少成交。
彩星大股東陳氏家族靠做忍者龜起家，發達後置業收租，家集團最值錢物業係尖沙咀彩星大廈，喺正廣東道海港城對面，另外喺屯門有座工廈，加上在英國等地都有啲物業，所以家當幾雄厚吓，家佢帳面淨值有成29元，同收市價11元有成六成半折讓，息率有2.55厘。
佢去年旺市時，股價曾經去過10元，之後跟隨大市跌穿咗9元，呢鋪反彈竟然彈高過去年高位，好可能係有人睇中佢名下資產。彩星家市值23億元，淨係半幢尖沙咀物業都唔止呢個價錢，尤其家工商業樓宇仍然承接力好好，同住宅市道有啲唔同。大家都係冷冷哋炒資產，買呢類有息派的股，照計就穩陣過炒啲有抽水風險的股仔囉。
陸羽仁
金融High Tea 舊文
來源 source: http://hdfin.stheadline.com