黑天鵝唔易捉
2016年06月16日
A股入摩昨早揭盅，結果買大開細，雖然內地臨尾繼續發力，增加境外合資格投資者(QFII)額度畀美資，但MSCI指數公開依然唔肯開綠燈，將A股納入新興市場指數。由於A股入摩機會事前開始降溫，結果港股低開之後好快回穩，午市仲倒升，頗有大戶鬥法的味道。
摩根士丹利資本國際(MSCI)昨日為A股入摩揭盅，表示中國當局為滿足國際投資者需求，A股市場的准入制度進行一系列顯著改善，國際投資者對相關改革表示肯定，但仍然未足以將A股納入新興市場指數。中證監新聞發言人鄧舸就反擊，納入與否是MSCI明晟公司的商業決定，但強調中國已是全球第二大經濟體，A股市場的國際影響力正在逐步提升，任何沒有中國A股的國際指數都是不完整的。
由阿爺咁悻悻然嚟睇，唔排除內地早有心理準備，所以消息公佈，就見到內地股市帶頭回升，上證指數全日仲漲咗1.6%，報2887點；深證成指漲夠2.8%，報10173點。
阿爺截索羅斯胡
旗下管理大量資產的道富環球投資管理公司，佢嘅亞洲(除日本外)投資組合策略部主管Mark Valadao，A股納入MSCI新興市場指數是必然發展，這只是時間的問題。一旦A股獲全面納入MSCI指數後，中國在新興市場指數的權重，將相當於美國在已發展市場指數的權重。由於六月入摩無望，喺個市日日要搵炒作理由下，市場焦點相信會轉向深港通的啟動時間。如果由內地股市策動嘅夾淡倉係阿爺嘅部署，咁唔排除夾完一輪後個市又會變番自由浮動，咁個市喺仲有不明朗因素下唔排除會軟番。
呢次入摩失敗嘅震盪，遠比估計為低，最大原因係之前個市炒佢成功嘅熱浪唔係咁強，上周開始個市已回軟，今個星期五仲提前插低五百點，唔排除有大戶睇到勢色唔對，已經開始食胡，如果沽空博佢入摩失敗者，到揭盅時已經被人截咗胡。有中環茶友話，A股入摩失敗唔知算唔算未能預見嘅黑天鵝事件。如果算嘅話，咁昨日大市不跌反升，就話咗畀我哋聽，家要捉黑天鵝真係唔容易。
喺入摩揭盅前，新加坡嘅A50期指成交大增，索羅斯打開口牌話落重注沽空博內地「撻Q」，陸羽仁喺網誌已經講，佢唔會咁憨居公然就落注，咁做得有可能係收到料。不過，索羅斯收到料，可能阿爺都收到料，於是就係壞消息當手拉番個市上去，等索羅斯狙擊黑天鵝嘅計劃落空。有趣嘅係，當大鱷想沽空中國做世界之際，渣打集團(2888) 行政總裁溫拓思上場後首度評論中國，撰文強調很多人擔心中國經濟增長放緩，以及中國能否把控艱難的經濟轉型。一些中國去年出台的政策也令市場感到恐慌，儘管存在很多實實在在的風險，但佢就認為這些風險是可控的，中國的政策制定者也很了解這些風險，所以現在不是沽空中國的時候。
中國增儲利有色金屬股
溫拓思仲話，自己在與中國政府官員對話時，他指察覺到他們身上新出現一種謙遜感，並願意承認過去犯下的錯誤，比如在去年股市泡沫中的錯誤舉動，以及人民幣貶值的溝通不力。佢嘅意見係，今年中國政府在政策溝通上更加清晰，雖會有顛簸，但是他們下定決心要實現成功轉型，睇嚟喺有人造淡之餘，都有啲人仍然想同內地做多啲生意喎。
借於A股倒升，港股尾市一度升166點，恒指收報20467點，升79點；國企指數收報8609點，漲26點，周二被德銀升目標價的重磅股騰訊(700) 力撐大市造好，重上170元關，推動恒指56點升幅，收漲2.8%造173元，為升幅最大藍籌，可見資金力拓大股的效果。由於成交只有585億元，動力唔係咁足，所以雖然暫時避過一劫，對後市似乎唔可以過份樂觀。
中國有色網報道，國務院發文要求嚴控有色金屬新增產能、加快退出過剩產能，同時，還要健全儲備體系，包括完善政府儲備與商業儲備相結合的儲備機制，適當增加部份有色金屬儲備；探索開展企業商業儲備試點，鼓勵金融機構研究支持商業收儲。按照呢個消息，對於內地嘅有色金屬股應該會有利好。
陸羽仁
金融High Tea 舊文
來源 source: http://hdfin.stheadline.com