財經評論：新人經紀做唔長？
■地產經紀入職不難，但能否做得久就是另一回事。 資料圖片
近期樓市有起色，二手轉好造價升，多個新盤陸續登場；地產代理把握時勢，龍頭行中原地產計劃未來半年增加25間分行至400間，人手加近一成至6,000人。市靜縮皮，市旺擴充，做生意好正常，事實請人不難，基本入職要求
具中五程度就可以，但能否做得久就是另一回事。
業界請人分兩類，一類是持牌營業員，一類是冇牌暫時做見習生；後者需通過考試成為持牌代理，如果配合到每兩個月一次的試期，快則兩個月完成，配合不到或肥佬，需時三、四個月不等。
見習生冇牌不能向客人推銷及帶睇樓，留在分行等同助理文員，做文書處理、影印及配匙等工作，感覺較鎖碎，學習睇文件嫌煩嫌悶，如此嫌三嫌四，做得一兩日就唔做。見習生待考牌期間，獲公司安排上考牌班，但個別過往冇心機讀書，現在讀考牌班一樣唔到腦，於是又唔做。
問過相熟分行經理，上述情況經常發生，雖然有些後生仔女及中年人攞了牌才入行，但全新人等同白紙，始終未做過，真正要打電話畀業主，不懂開口溝通，害怕接觸，覺得好厭惡，實戰外出新盤撈客企街辛苦，令他們萌去意。為激勵新人，勸喻他們唔好單睇眼前困難，睇番師兄師姐做出成績有報酬，唔好靠份底薪，否則做保安收入仲好。
你有你講，佢有佢諗，人各有志，總會有去留。分行經理指，新人通常捱得過三個月，繼續做落去嘅唔多，平均10個得3、4個留低。能否做得長遠，看個人持久力，例如早幾年入行的代理，做開升市搵錢容易，誰知去年第三季起跌市，未試做得唔順，接受唔到，冇傭冇生意，不是自己轉行便被炒，所以話呢行流失率高。
記者：溫潤潔
財經評論 舊文
來源 source: http://hk.apple.nextmedia.com