智取大市：地產股轉強啟示
■本地地產股有條件中短線繼續強，估計有多一成水位升。 資料圖片
上期講到全球放水、低息憧憬，領展（823）作為地產收租股龍頭，已升到破頂。其餘傳統地產股新地（016）、信置（083）之類，英國脫歐結果後，升約一成，仲強過騰訊（700），早兩日跌市又唔跟跌，強
勢近年罕見。劇本十分簡單，放水低息預期，而英國脫歐又唔太關佢哋事，所以成一面倒受惠嘅板塊。
恒指過去半年一味靠騰訊頂住，即使係葉師傅上身一個打十個都唔掂，因為講緊一個打49個；難得家陣本地地產股由淡友陣營跳去好友陣營，打法唔同曬。另大戶一注獨贏騰訊呢個畫面持續咁耐，已非常餓波，難得有個大sector有轉機可炒上，梗係飛撲入去。本地地產股的確有條件中短線繼續強，估計有多一成水位升，連帶恒指亦偏強。客觀形勢睇，恒指上升條件係年初至今最強時刻，至少衝上22000點，應該唔難。
不過，小弟長線睇淡地產股立場冇變，因為地產股唯一上升催仳劑只係低息預期，佢哋冇改善基本因素嘅能力，一味食老本，仲要畀大陸發展商中海外（688）之流南下搶地皮，長線點都冇運行，低息放水預期消化曬就冇fuel，總會跌返轉頭。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com