女神tea time：
Gold is King！
■股票市場前景好淡，買金保平安！ 資料圖片
英國公投，意外脫歐，市場呢期chok就走唔甩，呢個時候要做嘅，就係要避險，即係買金！
其實家陣情況比想像中嚴重，事關英國公投後，反映民粹主義抬頭。（所謂民粹，簡單來講就係知識
分子唔buy嗰套，但唔好理，你喺民主制度下，你投票過咗就過咗，你理得佢係咪民粹。）
喺英國公投前，已經傳出歐盟一早傾好，一旦英國脫歐，就會有Plan B，亦即要脫歐後嘅英國死得好慘！唔係話方丈，而係要起一個阻嚇作用，「其他國家，你見到啦，一脫歐佢死得好慘，你咪試下囉！」
問題嚟啦，意大利10月就修憲公投，如果否決，意大利總理倫齊就要落台，咁民粹主義政黨「五星運動」就好大機會上台，隨之而來嘅，好可能就係另一次脫歐公投。以最近民意調查顯示，四成人未揸定主意，但有34%人反對修憲，只有29%支持。
咁即係話，喺10月前，相信歐盟最少一定會繼續搞到英國好慘好慘，令意大利人相信民粹係唔work！
喺咁嘅情況下，市場會繼續混亂。大家要注意係，意大利銀行壞賬嚴重，達3,600億歐元，佔銀行總貸款17%。英國嘅慘烈，只會令意大利情況雪上加霜。簡單講一句，即係意大利橫死掂死！所以英國脫歐只係危機嘅開始。
你可以話，唔係呀，個市都有反彈，但你留意返，港股早幾日就算反彈，啲REITs都不斷新高，證明唔少資金炒之餘都掃定避險股。前景好淡，買金保平安！
歐洲央行今個月尾，就會公佈歐洲銀行壓力測試，到時大家就有個底，知道意大利到底頂到幾多。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com