金屬炒作潮
2016年07月05日
英國話要離開歐盟大家庭，市場驚魂甫定，反過來將壞消息當好消息炒吓，喺憧憬央行放水下，貨幣唔值錢之時，最搶眼嘅係市場對金銀看漲情緒，空前高企。
貨幣唔值錢 資金搵窿捐
大市昨日除咗炒避險同息口敏感股，資源及鋼鐵股落鑊熱炒。江銅(358
) 升逾8%，造9.34元；中鋁(2600) 抽升7%，造2.6元；金價曾升穿1350美元大關，紫金(2899) 升5.8%，造2.74元；招金(1818) 漲4.5%，報8.56元；螺紋鋼期貨升至9周高位，鞍鋼(347) 抽升近10%，收3.79元。
陸羽仁之前講過，內地因為游資搵嘢炒，早前推升咗金屬價格，令相關股份都反彈咗唔少，呢類資產同經濟背馳，再加上阿爺加大商品期貨按金，自然要留意金屬股會唔會位高勢危。不過突然爆一劑英國脫歐，呢個突變令呢個商品炒賣潮又添柴火，主要係全球貨幣同利率格局畀公投搞亂晒，家英鎊、歐羅前景不明朗，全球除咗美元好少少，其他主要貨幣唔係明傷就有隱患，結果令商品開始異動。
公投當天，黃金、日圓等少量避險品種就引發巨資關注，帶來黃金價格和日圓匯率急漲，原來白銀炒作潮仲勁。德國商業銀行分析師稱，白銀兩邊受益，一方面受益於高金價帶動，另一方面因白銀主要是用於工業，還受益於基礎金屬價格的堅挺。根據紐約期貨交易所報價，自英國公投退歐以來，金價已累計上漲逾7%。同期，白銀價格累計暴漲逾18%，更曾一度突破21美元一盎司，創2014年7月以來新高。
家全球貨幣無乜邊隻信得過，至於各國政府債券都炒到半天高，喺無乜好買下，似乎資金又流番去商品，呢個說明咗點解金屬同資源股呢幾個交易日炒得咁開心。呢個浪潮能否持續，要看美國利率走勢，萬一真係減息，商品就有排炒囉。
地產股短炒唔加息
喺資金搵嘢炒下，恒指再升，一度升咗372點，高見21166點，收報21059點，飆升264點；國企指數收報8802點，漲89點，成交金額686.68億元。昨日地產股都炒吓美國唔加息。
早排地產代理無生意，鬼殺咁嘈話要減辣，但政府同金管局就一於當睇唔到、聽唔見，地產界見減辣無料到，呢排又唱番好，話樓市跌定咗，差餉物業估價署嘅數字仲話二手樓連續兩個月回升喎。曾預言細價樓價爆煲嘅湯文亮，呢兩日又話唔排除樓市最壞時刻已經過去，搞到好多想買樓嘅人開始有啲擔心樓價會上番。
喺市場相信美國聯儲局今年加息機會低，更有分析估計聯儲局或要掉頭減息，本地地產股被舞高，長實地產(1113) 揚4%，造50.45元；新地(016) 升幅相若，造96.75元。
陸羽仁就覺得，好難斷言樓市最壞時刻已經過去。美國若然唔加息，當然對樓價少咗一重壓力，但呢個唔係影響樓市唯一因素，因為樓價仲要睇負擔能力，同埋供應量。如果經濟唔好，潛在買家收入減少或對未來職業安全嘅感覺差咗，加上落成樓宇增多，都會壓抑樓價。從97年樓市爆破經驗，樓價唔會一插到底，多數係會反覆回落，好似98年後樓價彈過一彈先再插，插到去二千年科網股熱潮又彈一彈，之後跌到2004年先見底。
家樓價喘穩，利息因素無以前咁惡劣，但中港經濟仲未見底，所以係咪最壞時刻已經過去，仲係言之尚早。須知道買樓動輒幾百萬，佢嘅波動無咁快同密，股市日日有交易，成日炒上炒落，現階段最好都係當地產股係短炒吓息口唔加，唔使咁認真去諗咁係咪代表樓市已經跌完。
陸羽仁
金融High Tea 舊文
來源 source: http://hdfin.stheadline.com