中環在線：
銀杏館搵舖 請湯文亮食檸檬
■餐廳銀杏館唔領湯文亮情，搵咗第二間舖繼續經營。
喺饒宗頤文化館嘅社企餐廳銀杏館今年中「被結業」，樓市專家湯文亮阿仔湯振傑，當時即刻建議將佢哋喺灣仔莊士企業大廈3樓全層，用市價七折、月租12萬元租畀銀杏館，一心想做好心人，但原來香港地有好多善
長仁翁，銀杏館最終選擇租入油麻地一單位繼續經營。
何解湯文亮想做善長仁翁，但係做唔成，而佢灣仔個舖最終又用番市價租畀其他食肆，係咪佢唔夠慷慨先?
■湯文亮 獲7業主相助
湯文亮就回應話，當日事件曝光後，好多人想做善事，有7個業主搵銀杏館，「當時我覺得佢哋冇地方，咪商量嚇，畀佢哋睇嚇，業主唔係無良嘅，好多好好嘅業主喺度㗎。」當時湯文亮提議月租大約12萬元；咁佢有冇再減租去促成呢單好事？佢就話：「佢哋都冇要求，直情冇傾過租金，佢話有啲地方平租、啱用，連話要平啲喇，呢支歌仔都冇。」善長做唔成，他直言：「我係想幫佢，但既然有人幫得仲徹底過我，咁咪不如等人幫囉。」
銀杏館最終決定搵另一位善長仁翁，以月租12萬元，租入油麻地平安大廈一個2,530方呎嘅樓上舖。而湯文亮喺灣仔嘅4,500呎大舖，後來以月租16.8萬元租畀一間私房菜。點解銀杏館寧願以相同租金，租個細啲嘅舖？或者唔想過海啩，總之可以繼續經營就好。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com