Money Walker：
內地另類經濟指標有好轉
■紅酒指數上升，多少反映內地消費過去幾個月有好轉。 資料圖片
中國經濟近半年似乎回穩，但由於市場成日質疑中國經濟數據嘅真確性，所以筆者唔拎傳統經濟數據講，轉而參考嚇啲做數機會較低嘅另類經濟指標。
Liv-ex紅酒100
指數，一個代表二手市場上最多人尋找嘅100支佳釀價格變化嘅指數，自去年12月起至今年7月，升幅超過一成。Liv-ex紅酒100指數係追蹤指定紅酒喺全球嘅價格，而中國係全球最大嘅紅酒市場，該指數上升，多少反映內地有錢人開多咗紅酒嘆，所以呢個指數亦係內地富裕階層嘅另類消費信心指標。
至於另一個內地另類經濟指標係「箱板紙」價格，「箱板紙」係內地講法，即係我哋叫嘅紙皮。用來製造紙皮箱嘅紙皮，售價之所以值得留意，係因為紙皮價格能夠間接反映零售需求，事關多舖頭定單，先會多工廠訂購紙皮箱裝貨，紙皮價格先至會搶高。
行內報告指，內地紙皮售價近期上升，而且售價升幅仲超出成本漲幅，反映紙皮供需面有改善。紙皮箱供需有改善，不外乎係因為供給側改革見效，或內地消費需求好轉，所以用多咗紙皮箱去裝貨。不論紙皮價升係邊個原因，對中國經濟而言都屬正面因素。
紅酒指數同內地紙皮價雙雙上升，多少反映內地消費過去幾個月有好轉，而背後原因可能同內房價格回升有關。不過筆者仍然覺得單靠逆回購呢類微放水措施，以及刺激內房價格上升，無法持續推動經濟，阿爺只係走返回頭路，咁做係可以延遲支爆來臨嘅日子，但同時亦係令中國經濟重新捲入惡性循環中。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com