操盤手劄記：
北水放假趁機尋寶
■晨鳴紙業一類大型民企向來係大媽所愛，北水南下，自然水漲船高。 公司網頁
美國大選首場電視辯論早兩日上演，但仍有兩場電視辯論，希拉莉仍未擊倒特朗普，不過若民調繼續領先，對美股可起穩定作用，對港股亦係好事。
港股越來越依賴北水，但港股通因國慶及重陽假
期，今日起至10月10日暫停交易。喺港股通關閉嘅12日之中，港股有7日開市，呢7日無北水支援，隨時好似中秋咁腳軟。昨日已見北水喺長假前沽貨套利，先行離場。
今日北水閂閘，撞正期指結算，小心！不過明日（周五）季結，又可能有粉飾櫥窗活動。大市目前處於三角待變形態，短線支持位為9月2日低位23152，短線阻力位為9月22日高位24058。今季喺北水掃貨下，大市累升13.6%，若北水放假大市回調，反而係入市機會。踏入10月，政治市格局明顯，除了美國選情，仲有意大利修憲及國會改革公投；10月1日人幣納入SDR，阿爺可能出手維穩。
10月有危有機，宜耐心選擇估值合理、息率高，以及景氣度較好嘅股份，我嘅心水係晨鳴紙業（1812）。晨鳴以造紙為主業，融資租賃為副業，前者受惠紙漿價格下跌，毛利率升至23.5%，後者毛利率更達87.7%，公司上半年多賺2.4倍。
由於供應減少、需求增加，造紙業下半年出現小陽春。晨鳴近日已對部份高價紙品試行加價，利錢更厚，全年盈利更樂觀。晨鳴係深AH股，具深港通概念，目前A股較H股有近四成溢價，而H股亦較資產淨值有近三成折讓。H股現價7.46元，市盈率12.8倍，息率4.8厘，呢類大型民企向來係大媽所愛，北水南下，自然水漲船高。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com