收市閒情：
「港式足球」之父689
■喺689身上，可以睇到咩叫香港打工仔精神。 資料圖片
萬眾期待，橫洲足球賽開鑼！呢場波當然精彩，但更精彩係我喺佢哋身上，睇到咩叫香港打工仔精神！嘩！負責守龍、紅衫紅褲嘅689，面對場邊界外嘅朱凱廸七旋斬，689用銳利嘅眼神，大力一卸！估你唔到，
你以為龍門最好嘅朋友係門柱？咁你就錯啦，係膊頭呀！識人好過識字，如果唔識人嘅，咁你就至少要識一個英文字，叫A字！
好啦，個波一個A字射向薯片叔叔！點知後衛薯片叔叔一個回傳畀番689，689再即刻轉身射個三分波畀奶媽，奶媽奶嘢又再交番畀689……哎呀！冇其他隊友再畀佢交波啦。好傳唔傳，傳畀史上最得人驚嗰種打工仔！咩？想唔撈嘅打工仔呀！都唔撈啦，咬你食呀！
財爺最勁個位係，拍枱、爆你、起身一條龍，「會我就冇開，死貓我就唔食㗎啦！」回傳時加𠝹刀喺個波度，「冇決定分期形式發展橫洲」幫大家highlight埋重中之重係邊個point，曲線強調呢個point係某智者提出，神奇！頂級！超卓！Man of the match仲唔係你？
咪住，689都唔係省油嘅燈，睇佢往績，就知佢本身已係一個神級打工仔！點解？佢做曬所有打工仔夢寐以求嘅嘢啦！
有錢！做CE月薪37.1萬，好好啦，仲有間特首官邸，唔使畀租。有假！上場四年，放假57日，一年平均放14日，多過曾蔭權嘅年均12日同董建華年均7日。Work life balance嘅嘢你識條鐵咩，呢啲咪叫以身作則囉。有權！唔好唔記得，佢係一個龍門，但689個龍門係任搬！一個打工仔，做到任何嘢都有權搬龍門，你話夫復何求？
呢場波，邊個係man of the match就未知，但香港政府高官，竟單憑互相傳波贏到「掌聲」；但大家有幾耐冇聽過有一個官，係因為一項德政而贏到真正掌聲？呢種「港式掌聲」越大聲，香港就越快玩完呢！港式足球成點都好，輸嘅都係香港。
今日！決賽！689同薯片叔叔開記招！
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com