Money Walker：
MPF風水輪流轉
■MPF港股基金表現由半年墊曬底去到近期跑贏，不過小心隨時又再風水輪流轉。 資料圖片
風水輪流轉，有邊個估到半年前表現墊曬底嘅MPF港股基金，最近3個月竟然跑贏其他類別嘅MPF，全數港股基金最近3個月回報超過一成，表現最
差嗰隻都升近13%。
多得北水推動多隻指數重磅股造好，帶動港股追落後，多隻港股基金年初至今累計閒閒哋都有7%、8%回報，當中以唔揀股純追蹤恒指嘅港股MPF，最近幾個月表現尤其突出。
而屬上半年MPF贏家嘅環球債券基金，則由於美國加息預期升溫，最近幾個月表現麻麻，即使係最靚仔嗰幾隻，累計年初至今回報亦只有7%左右，略為跑輸港股基金。
港股無疑正處於蜜月期，不過嚟緊亦都有啲隱憂，事關北水掃貨會掃到幾時至停手根本冇人知，話曬北水都已買貨買咗好一段時間。亦有分析不排除喺11月深港通正式通車後，部份投資者會趁好消息出貨，升市隨時嚟個反高潮。
唔單止咁，無論係港股基金、環球債券基金，定係亞洲股票基金，都有機會受到美國12月加息拖累，所以越接近12月，就越應該準備好震盪隨時來臨，打工仔可能要分階段減持呢幾類MPF。
不過喺加息陰霾下，MPF避險選擇其實不多，性質接近揸cash嘅貨幣市場基金，可能係同時合乎穩陣同管理費低兩大條件嘅唯一選擇。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com