小心特朗普震盪
2016年09月28日
港股昨日反彈，但中環話題唔係個市，亦唔係棕地問題，而係美國總統首場選舉電視辯論。去到而家，大家已唔能夠抹煞特朗普做總統的機會。
華爾街大戶做嘢
有中環茶友笑言，呢個特朗普，原來係美版「巴基之星」，出閘鈍鈍地，點知後上殺低唔少大熱，包括布
殊家族第三個總統希望杰布，而家嚟到電視辯論，佢同克林頓家族第二個總統希望希拉莉的支持率已經相當接近，所以股市已經唔可以當佢無到啦。
有人認為，如果特朗普勝出，都算係黑天鵝事件，有啲估佢唔到。惠理投資董事葉浩華就話，美國大選方面，如特朗普勝出，會令市場出現避險情緒。他指出，基金關注由特殊機會及事件主導的項目，但佔投資組合的比例不高，只有單位數。佢對來年的投資回報目標都唔敢咁進取，坦言如有6至8%已經滿意。
特朗普無乜行政經驗，若然勝出會否搞到世界大亂呢？喺特朗普選情升溫之初，有同佢交過手的富豪對陸羽仁講，特朗普為人認真麻麻，如果佢做左美國總統，咁就要移民離開地球。
但茶友就無睇得咁淡，理由係做左鬼就識迷人，坐得上美國總統呢個寶座，自然就識得靠譜，唔可以太離譜。而且美國既得利益集團咁厲害，你估無人同特朗普摸底咩，就算佢做左總統，都唔可以打橫行。
從美國前總統、共和黨的喬治布殊話會投票畀對手民主黨的希拉莉，可見既得利益集團已怕特朗普有可能當選，開始要為民主黨助選，唔排除希拉莉班華爾街金主，會喺選前做啲動作嚇吓人，隊吓個市，希望大家唔好投畀特朗普。
不過，從脫歐經驗睇，而家選民都唔係咁易俾呢啲震倉盤嚇親，所以茶友估計，特朗普引發的震盪，會喺選前發生，到變成現實時，可能「壞消息」已經消化。
滙控靠回購頂住
前日港股大插，說法係大家驚特朗普殺上。昨日個市反彈，理由又係話首場辯論後，民調顯示民主黨總統候選人希拉莉表現較佳，美股期貨一度急彈過百點，同時帶挈港股回勇，恒生指數高開39點報買盤持續湧入，上破十天線及廿天線，午後升幅一度擴至329點，收報23571，急升253點；國企指數收報9746，漲117點，成交只有647億元。
滙控(005) 與騰訊(700) 為升市主力，合力踢高恒指62點升幅。德銀因為被美國罰140億美元搞出一個危機，滙控用回購頂住自己個價，上日再度在倫敦回購股份，升1.3%，收58.1元，滙控回購推高左股價去到60元水平，跟住股價停左一輪消化，而家再度出擊回購，要睇吓有無內地大媽跟風，將佢推番過60元水平；騰訊則升1.32%，造215.8元。另一隻藍籌股友邦(1299) 走高1.37%，造51.9元，表現強勢。
交投少轉炒毫子股
另外，內銀股為升市主力之一，工行(1398) 、農行(1288) 及中行(3988) 包辦國企指數成份股首三大最大升幅。工行升2.5%，造4.97元；農行漲2.4%，造3.41元；中行升2%，造3.6元；交行(3328) 走高1.66%，造6.11元；建行(939) 彈1.2%，造5.86元。
大股之外，多隻毫子股落鑊熱炒，蒙古能源(276) 喪升88%，收0.315元，為升幅最大的個股；西伯利亞礦業(1142) ，股價狂升34%，大市交投唔多，估計大家玩掟飛鏢遊戲，毫子股炒作仍會延續。
陸羽仁
金融High Tea 舊文
來源 source: http://hdfin.stheadline.com