金融High Tea 2016年10月28日
賣盤共富貴
2016年10月28日
美股同港股一樣，近日都無法突破，華爾街觀望大選之餘，主要係靠公司併購同大型上市，頂住十二月份可能加息的壓力。
美股呢排焦點之一，係通訊軟件商Snapchat籌備招股，預計上市後市值達到250億美元，估值遠高於twitter的140億美元市值，仲可能係過去三年最大嘅科網股集資活動。
美股等Snap上市
面世只有五年左右嘅Snapchat，由兩名史丹福學生創辦，佢哋想出「閱後即焚」的聊天創意，針對社交媒體引起嘅私隱憂慮。佢上載嘅文字和照片超過一定期限後會消失，如果有人用手機截圖，發信人會收到通知。呢種機制令佢受年輕一代歡迎，快高長大後，上個月Snapchat改名為Snap，並且把產品擴展到硬件領域如帶攝像頭的眼鏡，創見之前曾有報道，未來Snapchat的用戶可以一邊戴着眼鏡一邊與好友社交。今次上市被包裝成可以挑戰龍頭facebook。喺佢明年初預計上市前，為市場提升了對科網股的憧憬。美股同內地A股都無力，港股開市無耐已插落。午後大市升幅略為回穩，恒指收報23132點，下挫193點；國企指數收報9608點，下滑89點，成交金額588元。長實地產(1113) 出售上海陸家嘴「世紀匯廣場」，股價升0.63%，造55.6元。近日升得多的板塊都借勢回吐，內地煤炭期貨大跌，煤炭股沽壓顯著。兗州煤業(1171) 挫4.5%，造5.9元；中煤(1898) 降4.7%，造4.46元；至於神華(1088) 下滑2%。
除咗藍籌股，呢排個市炒吓恒指換馬，有大行幫手造手，出報告吹吓隻豬肉股萬洲(288) 。高盛發表報告，話萬洲旗下美國的Smithfield公佈第三季營運盈利大升60%至2.46億美元，雖然萬洲旗下的內地業務雙匯營運盈利跌3%至14.66億元人民幣，但美國業務強抵銷內地業務疲弱影響。由於中國下游業務疲弱，加上美國豬價下滑，故調整萬洲2016至2018年每股盈利預測1至2%，達7美仙，目標價8元，萬洲昨日收報6.79元，跌1%。
聯泰小股東終可離場
美國除了上市外，都有巨企併購，相反，香港就三、四線股賣盤多。聯泰控股(311) 公佈，會由上海紡織(香港)提出按每股1.8元向公司股東收購全部已發行股份，每股收購價較停牌前收市價1.85元，折讓2.7%。若全面收購收購8.3億股股份，涉及金額14.9億元。賣盤之餘，聯泰將剝離非核心業務予主要股東陳亨利持股55%的Helmsley，即服裝及配飾的零售銷售及買賣及鞋履製造業務，以及貨運代理及物流及房地產開發業務，代價1.1億美元。完成交易後擬向全體股東宣派每股不少於0.82元的特別中期現金股息。即係話一切搞掂後，股東可以有2.62元落袋。
聯泰喺2004年上市，至今上市已經超過十年。有中環茶友識得公司大股東陳亨利，話佢係殷實商人，曾經諗過競選功能組別議員。呢類殷實商人做生意正正經經，又唔會玩財技，上市咁多年唔係點集資，年年要派息，其實無乜大好處。從小股東角度，雖然管理層努力打拼，但呢類實力股仔交投唔多，若然唔賣盤好難反映公司價值。去年好多時間，股價都喺一元水平上落，所以陸羽仁成日話，大股東若然用唔到上市地位，賣盤等小股東套現離場，享受公司應有價值，呢啲共富貴嘅表現先最值得表揚。
陸羽仁
金融High Tea 舊文
來源 source: http://hdfin.stheadline.com