有幸扑中老磚股
2016年10月06日
美國聯儲局近期加強市場對利率上調嘅預期，弗吉尼亞州儲備主席Jeffrey Lacker日前走出嚟放鷹，揚言目前有充份理據加息及控制通脹，對聯儲局加息比較敏感的美國2年期國債收益率，在Lacker講話後由0.8厘升上0.82厘，10年期國債收益率
亦由1.62厘升上1.69厘，反映市場似乎憂慮聯儲局最快可能於11月1至2日開會時公佈加息。雖然我斷估覺得聯儲局等到12月先加正路一點，但市場已經有反應，金價先行跌左落去，本港嘅房託領展(823) 都逆市下插，跌2.1%，報56.75元。
四大油股領風騷
息口上調不利地產股，但都有逆市奇葩，老牌磚頭股萬邦投資(158) 呢排就升不停，昨日仲大升23元，收報183元，爆升14%。呢隻老牌股主要物業有兩項，最值錢係中環萬邦行，公司有兩大股東就係鍾氏家族同啱啱仙遊左嘅鄭裕彤家族公司，鍾家同彤叔兩個都咁疊水，所以多年來坐住啲股份唔賣，公司嘅資產亦唔郁，O依家鄭家換左掌門人，鍾家嘅大家長都係一把年紀，可能因此觸發股價上升。
萬邦投資連日升完，先至得46億銀市值，公司話自己市值有70億元，呢個有講少無講多，皆因萬邦行喺正中環核心區，而且業權異常完整，只係呢類公司幾十年無咩搞作，有幸扑中佢有動作，買家呢吓真係絕對唔容易。
美國放鷹，美匯上揚，金價應聲大跌3.3%，錄得六連跌，金礦股全線捱沽。招金(1818) 挫4.6%，造7.5元；SPDR金ETF(2840) 下滑2.7%，造941.5元。不過港股無畀息口前景嚇到，恒指收報23788點，上漲98點；國企指數收報9811點，升54點，成交金額523億元。
由於倫敦布蘭特期油曾創4個月高位，帶挈「三桶油」全線升。中石油(857) 升3.08%，造5.35元；中海油(883) 升3.8%，造10.14元；中石化(386) 升2%，造5.85元，加埋昆侖能源(135) 升2.7%，四隻股份霸佔藍籌最大升幅頭四位。油服股繼續借勢炒上，獲野村轉軚睇好的中海油田服務(2883) 勁升7%，造7.72元，跑贏一眾國企指數成份股。
有線撈底要等等
九倉(004) 出售電訊資產終於揭盅，集團宣佈以九十五億元出售從事固網業務的九倉電訊予私募基金TPG資本及MBK Partners合組的財團。九倉及會德豐(020) 在交易中，分別獲利七十四億元及四十五億元，九倉股價造57.45元，微升0.17%，會德豐跌0.96%，造46.45元。正如陸羽仁早前提示，今次有線寬頻(1097) 不在賣盤之列，故此消息一出，有線股價即時下插，瀉6.2%，造0.91元。
早前由於市場曾傳言于品海及有關人士出價競購有線，令有線股價衝上今年新高。于品海最先對消息無反應，去到上個月就公佈話自己同所屬公司無傾過，外界感覺係有人摸底後交易觸左礁，但好多老散對九倉電訊同有線寬頻都搞得唔係好清楚，呢排公司話出售電訊資產去到尾聲，有啲人仲以為有線寬頻好事近，結果消息公佈就一盤冷水淋落嚟。
九倉賣左電訊業務，剩番電視業務仲難做，不過，有危就有機，九倉既然先前有意賣左媒體業務，只要啱價佢都會傾，以佢O依家市值成18億元，就算賣得成水位都有限，所以O依家就無謂撈底，到佢跌番咁上下又無乜消息，咁或者係投機博賣盤嘅時間。
陸羽仁
金融High Tea 舊文
來源 source: http://hdfin.stheadline.com