地產潮文：
市民安居香港易管
■香港人越來越難安居樂業，才透過政治爭取應有生活權益。 資料圖片
政治一日都嫌長，齊昕父親上星期表示唔連任，奶媽就話重新考慮選特首。薯片星期一仲辭埋職，雖則當晚未有明確表示參選意向，加上早已宣佈參選嘅胡官與磨拳擦掌嘅葡萄，四人混戰嘅局面一觸即發。
投稿時，四名候選人暫未有明確嘅房屋土地政綱。奶媽和薯片做政府高官多年，熟悉政府運作兼有決策權力，但𠵱家先加入新政綱只會面對「點解唔喺任內做」嘅質疑，好難自圓其說。胡官話周三會公佈政綱，觸及收棕地建公屋等議題。葡萄似乎係四人最有計劃嘅一個，旗下政黨早於去年就提倡成立土地發展局，從長遠需求規劃土地供應，建立熟地倉；並主張興建與收入掛鈎的資助住宅單位。
觀乎近日特朗普致電蔡英文及對中國嘅態度，可以預視美中關係將會變得緊張。要平穩應對，北京就需要一個能穩定香港民心嘅特首人選。正因為香港人越來越難安居樂業，才透過政治爭取應有生活權益。香港樓價租金高企，上樓難，換樓階梯亦消失，新樓環境亦變差。新一屆政府無可避免要就新界丁屋、新樓劏房化等議題提供具體解決方案，讓市民安居樂業，減少怨氣，重建政府威信。
今年立法會選舉候選人只懂人身攻擊，顧左右而言他，缺乏認真的政策倡議，結果選出來嘅議員都缺乏公信力，一眾特首候選人應引以為戒，拿出真功夫令市民信服，讓北京專注應對國際社會嘅挑戰。
地產小子
http://www.propertykids.blogspot.hk
本欄逢周四刊出
地產小子
地產潮文 - 地產小子 舊文
來源 source: http://hk.apple.nextmedia.com