油股有火
2016年12月15日
議息前夕，美股繼續開足馬力上衝，杜指再闖新高，呢個係幾典型嘅亢奮現象。美國經濟升溫，美元匯價因為息口上升吸引資金流入，成為推高股市嘅動力，呢種情況喺過去都有見過，特朗普組閣漸見雛形，為美股升市添油加火。
上日美國股市再闖新峰，杜指距離2萬點只是一步之遙，動力來自石油股。特朗普
埋班，可謂一片懷舊氣息，國防、能源主要跟番以前共和黨老路，搵返班油商做主要班底，金融、財政就有好重嘅高盛色彩，呢班都係傳統美國豪門精英大戶，睇返美國大油股埃克森美孚喺特朗普當選後反覆向好，過去一個星期升幅尤其顯著，爆上左92.58元嘅高位，同一年前低位72美元差不多升左三成。
埃克森大追落後
埃克森美孚受到盈利大跌影響，2015年股價係近年表現最差嘅時間，O依家特朗普當選，大家都估佢會唔會時來運到。喺奧巴馬年代，佢首先係放寬左喺國內開探頁岩油，跟住大力支持鼓勵開發新能源，油公司喺過去10年基本上無乜運行。但特朗普係舊經濟人，佢首先就對溫室效應和減排呢啲環保觀點投以不信任票，繼而委任左啲石油業關連密切人士入閣，佢地唔單止做左能源部長，仲連國務卿都可能做埋。O依家埃克森美孚股價同近年高位103元仲有距離，所以資金一於炒走去落後。
另外，美股升幅已巨，隨時有較大回吐，小心美股下跌時，港股唔跟升卻跟跌。
近排買股都要睇住美國嚟走，好似美股創新高，但港股又係先升後無力，但石油股就跟炒得好開心。香港的「三桶油」亦熱炒，成交暢旺，中石油(857) 再升4.5%，報6.02元，而且成交搶高到21.66億元；中石化(386) 漲3.38%，報5.81元，成交金額12.57億元，呢兩隻嘢有追落後的感覺；中海油(883) 近排有啲弱，報10.38元，成交都只得8億元。石油股升得咁緊要，有啲超前左油價，但放長睇O依家油價同股價都唔算高，等佢回啲都可以考慮低吸。
最驚耶倫唔放鴿
港股呢排弱，都同內地收緊資金流出同A股唔靚仔有關。恒指周三高開，最多升181點，但A股受加強險資監管入市影響再插，雖然收市滬深股市回穩，但港股氣勢已窒左以低位收市。恒指收報22456，僅升9點；國企指數收報9706，跌13點，成交金額616億元，又再虎頭蛇尾，呢排見高去沽好易食胡。
本地投資市場情緒審慎，可以從本港離岸人民幣兌美元一年期掉期攀升睇到。昨日掉期升至2985點，創逾10個月高位，與在岸人民幣一年期掉期價差擴大至2500點，呢個亦係紀錄新高，掉期創高意味人仔一年後後市睇淡。人民幣兌美元即期收跌34點子，報6.9049兌1美元；中間價亦跌逾90點子。人民幣夜盤跌22點子；離岸人民幣則升值94點子，報6.9123兌一美元，較在岸收市價低75點子。
交易員話，美聯儲利率決議公佈在即，市場情緒略偏謹慎，交投放大；離岸流動性繼續偏緊的情況，預計還將持續一段時間，阿爺監管層或藉此減少離岸空頭的干擾，幫助穩定在岸匯率預期。美國今個星期應該宣佈加息，但開大定開細，就要睇耶倫之後嘅講法，以儲局官員最近口徑，應該放鴿機會較高，若然唔係，咁就唔嘢少嘞。
喺呢啲咁嘅市，大家興炒冷門嘅彈珠股，兩隻日本彈珠機股連日攀升，NIRAKU(1245) 收報1.22元，無升跌；DYNAM(6889) 再升至13.76元，漲1.2%。彈珠股炒起，皆因日本參議院本周通過日本賭場法案，不過，O依家框架通過左，跟住仲要睇細節係點。有估計今次修例希望可以趕及迎接2020東京奧運。若然係咁，濠賭股可能都會多左潛在對手。
陸羽仁
金融High Tea 舊文
來源 source: http://hdfin.stheadline.com