笑到最後：
炒股一動不如一靜
■金沙旗下巴黎人酒店開張，集團由齋賭博
轉型做綜合渡假中心。 資料圖片
又到年尾，回顧本欄表現，今年下半年高明有兩大推介：金沙（1928）同彩星玩具（869）。
先講金沙，高明喺9月26日賭股調整嘅時候推介，當日開市價33蚊，推介因睇好澳門轉型，由齋賭博轉型做綜合渡假中心。11月尾，金沙最高升到39.3蚊，升幅19%。最重要係，連博彩收入條數都好靚，由8月按年微升1.1%，終止連續26個月跌勢，之後每月增長加速，到11月按年增長14.4%，低潮後首次出現雙位數字增長。
不過，可能賭業銀碼大，同走資有關係。12月初澳門政府擬立法入境帶12萬元以上要申報，阻止升勢，之後一個星期仲傳埋銀聯境外提款上限降至5,000蚊，令濠賭股三個月嘅升勢打回原形，星期五收報33蚊，同高明推介時一樣。
賭股好處係，每個月頭都會公佈一次博彩收益，如果數字唔受影響，即係生意照舊。不過壞處係，數字好嘅時候，有心人又會傳出新嘅政策嚟打壓，再影響市場情緒。所以返轉頭都係要問番買入嘅原因，係覺得佢會轉型做渡假中心、行拉斯維加斯嘅舊路，新賭場開始傾向sell玩樂、渡假為賣點，證明個趨勢都係未變。股價回到起點，有本錢再博過，繼續等。
另一推介係彩星玩具，11月21日推介，開市價係1.23蚊，上周五收報1.49蚊，升幅21%。因為之前已經講咗好多次，純粹回顧，唔再重覆。
大家可能留意到，本欄有別於其他投資專欄，推介股票數量少，因為要「笑到最後」，最緊要嘅係減少損失、保住本金。點解普遍買樓會發達過買股票？因為買樓唔會佔好多時間，做到錢搵錢，人就去做其他更有意義工作；炒股票易迷失，一唔小心就會成日望住，原先想錢搵錢，望多兩望變番人搵錢。所以炒股票都要勿忘初衷，一動不如一靜，本欄會繼續見到真正嘅機會先至出擊，減少無謂損耗。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com