中環在線：
「物流張」同馬化騰拍住搵食
■民生物流老闆張順宜，啱啱拍板入
股投資騰訊（700）香港版網站。
之前政府不斷出辣招，除咗住宅，仲有工商舖物業都打壓埋，令到一班專炒物業嘅投資者冇啖好食。就好似幾年前不斷短炒舖位成名嘅「物流張」、民生物流老闆張順宜，近排靜極思動，啱啱拍板入股投資騰訊（700）香港版網站，決定同騰訊老闆馬化騰拍住搵食。
1億投資騰訊香港站
話說騰訊將於下個月農曆新年之前，開一個新網站「騰訊香港站」。呢個網站有啲似雅虎香港咁，係提供消費、旅遊、飲食等資訊嘅入門網站。其實大家都知騰訊網主要都係內地人睇，呢個「騰訊香港站」主要都係方便一啲嚟香港玩嘅內地遊客。
「物流張」話，之前經朋友穿針引線，知道網站想搵投資者，佢見機會難逢，所以就入股，買起呢個網站65%股份，成為網站大股東，連埋其他使費，總投資額高達1億元㗎，認真唔講得笑。
不過，佢呢個大股東只係負責幫網站做香港呢邊嘅廣告服務，廣告收入同騰訊拆賬，但網站內容同方向都係交由騰訊全權決定。
由於舖位好難再短炒獲利，「物流張」今年只係買得3個地舖，有啲仲未曾賣出收住租先。既然冇得炒舖搵食，都要另覓投資途徑，除咗呢次投資網站，佢之前已經為停牌多時嘅中國源暢（155）做「白武士」，炒家都要轉型呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com