操盤手劄記：加息周期恒生穩陣
■恒生業績有望好過預期。 資料圖片
上周，特首梁振英上京作任內最後一次述職，唔尋常嘅有兩點：第一，梁抵京後首先獲外交部長王毅接見，過往兩任特首都係首先獲總理、國家主席接見，梁則於行程最後一日才有此安排；第二，當時正值國務委員楊潔箎訪英，外長唔去外訪
，反而留京接待梁。究竟搞咩？香港特首述職，用外交規格接見？
過年後特首跑馬仔就會入直路，但現時喺沙圈踱步嘅，似乎都唔係阿爺心水。上月，末代港督「千古罪人」彭定康訪港時，連番鬧爆港獨，同阿爺啱嘴形喎，阿爺會唔會考慮聘請佢返嚟做特首？今年經歷英國脫歐、美國大選特朗普勝出後，市場對爆冷事件已慣見亦平常！
港股今年trade多兩日就完，今日期指結算，但因唔少基金經理喺聖誕假期前已計數離場，相信交投繼續淡靜，粉飾櫥窗未必出現。港股昨日假後復市，反彈179點或0.8%，收21754。轉倉主導大市，下月期指呈高水，反映轉倉以轉好倉為主。
明年市場焦點包括：人民幣貶值速度、美國加息步伐、美國新任總統政策、法德兩國大選對歐盟影響等。美國已預告明年加息三次，香港喺聯繫滙率下，遲早要跟隨加息。加息雖然不利股市，但有利銀行股，皆因加息有助擴闊淨息差，增加淨利息收入。
銀行股中，兩間國際銀行滙控（005）、渣打（2888）近年被國際監管機構贒實，官司纏身，所賺嘅錢幾乎唔夠畀和解費、賠償費；反觀本地薑恒生（011）就穩陣得多。除咗加息，近日香港拆息（Hibor）追貼倫敦拆息（Libor），亦對恒生淨息差有利。恒生業績有望好過預期，每股派息料會增加。
恒指今年以來跌0.7%，今季以來跌6.6%，本月至今跌4.5%；恒生同期分別升3.1%、升4.1%及跌2.7%，股價相當硬淨，明顯跑贏大市。該股現價143.1元，市盈率10倍，股息率6厘，加上係三隻每季派息嘅藍籌股之一，不失為淡市之選。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com