自成一格：網上掃平貨
使乜等Cyber Monday？
■外國Bl
ack Friday網上銷售飆升，好多人唔會再去舖頭同人逼。 資料圖片
上周四感恩節，美國人只會做兩件事，留在家中同親朋戚友食火雞，又或者去排通宵隊買特價貨。早前有個調查指，原來超過三成美國人都好鬼憎黑色星期五（Black Friday），另外有一半人都只係覺得OK，換言之只有不到兩成人鍾意。雖然大家口裏說不，但身體仍然很誠實，周四各大店舖一開門，啲人就好似《屍殺列車》啲喪屍咁，衝呀殺呀搶呀買呀，買嘢買到打曬交仲拎埋槍動真火，都咪話唔牙煙！
不過，據最新Adobe統計，今年Black Friday及Cyber Monday的網上銷售創新高，分別達33.4億及34.5億美元，按年上升21.6%及12%。數字反映咗啲乜？除了美國經濟真係好咗，各大媒體都吹呀吹，經濟好呀唔買等幾時之外，成個感恩節購物的模式都唔同咗。
其實間間舖賣來賣去都係嗰幾部特價電視，商家為咗爭地盤，就開始玩鬥早鬥快，越快推出來賣就越快搶到生意。百貨公司Target早於上星期一開始Cyber Week，另外Walmart亦一踏入周四淩晨就搶先在網上開始Black Friday大減價；eBay仲自製「Mobile Wednesday」，周三用電話就可以搶到特價貨。
既然上網同去現場一樣有得執平貨，點解仲要同人逼，安坐家中提早開始掃貨，仲可以一邊同屋企人食飯慶祝，然後嗰兩個禮拜日日都好似boxing day咁拆禮物，都不知幾開心！所以今年Black Friday的網上銷售直逼Cyber Monday，相信這個鬥快鬥早賣的玩法會繼續落去，Cyber Monday呢支歌仔可能過多幾年就無得玩喇！
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com