油價八年轉一運
2016年12月02日
油組宣佈減產取得進展，油價急升帶動石油板塊回勇，加埋內地工業數據理想，恒指早段高開，一度回升逾200點，氣勢相當唔錯，但之後有回吐出現，升幅收窄到88點收市。美國加息在即，大市咁樣已經叫做唔錯。
石油輸出國組織(OPEC)達成減產協議，由明
年初起，14個成員國合共每日減少產油120萬桶，為期6個月，明年5月再開會檢討，這是市場預期較高的減產數量。今次是油組8年以來首次減產，其他非油組產油國亦準備明年每日減產60萬桶。受減產消息刺激，原油價格彈升9%左右，倫敦期油升至每桶50美元水平。紐約期油曾經升一成，以每桶49.44美元收市，升4.21美元，升幅9.3%，是2月份來最大升幅。
就算轉勢都會反覆
油組減產初步有結果，不過實效仲要觀望，因為仲有非油組表現可以左右整個減產行動。瑞信私人銀行及財富管理亞太區首席投資總監John Woods就認為，油價或進一步輕微上升，但升勢將不能持續，因減產關乎石油供應層面，並不代表需求層面恢復過來。當油價處於每桶50至55美元時，開採活動亦會同時恢復，為油價上升帶來阻力，預計明年底布蘭特期油為每桶57美元。
有趣嘅係，今次係油組8年來首次減產成功，剛好同美國總統任期一樣。傳統上，共和黨被視為同油商友好，兩個共和黨前總統布殊都係石油家族，喺任內分別發動兩次海灣戰爭，令油價急升。相反，喺民主黨總統奧巴馬任內，借着技術突破大力開發頁岩油，令油價大跌，好多石油公司陷入困境。O依家共和黨再度執政，雖然新總統未上台，咁啱油組就成功宣佈減產，咁係咪代表油商睇到自己友上場，擦定牙等開餐呢？
呢個講法有小小陰謀論，唔可以盡信，不過，出身做地產商嘅特朗普似乎係舊經濟信徒，所以佢上台之後，循環性嘅股份表現明顯好左。炒油股最大好處係石油供應仲未平衡，好多產油國都想賣油，油價O依家仲係好低水平，油股估值唔算貴。好似瑞信所講，商品循環就算真係出現上升，初期都會係好慢同反覆，等愈嚟愈多人相信，咁升勢先會漸趨明顯，所以炒油股最好係低買高沽，來來回回，玩得好一樣已經夠殺。
雖然三桶油爆上，推動恒指高開，一度高見23012點，可惜之後無力再上，高位更遇沽壓，結果恒指以接近全日低位收市，小升88點，收報22878點；國指表現較佳，升54點，收9892點。三桶油抽上後大致企穩，中海油(883) 升6.1%，收報10.38元；中石油(857) 升4.7%，收5.52元；中石化(386) 則收5.55元，升2.4%。油服股亦全線造上，聯合能源(467) ，收0.37元，升23%；百勤油服(2178) ，收0.53元，升10%；海隆控股(1623) 收2.28元，升9%。
恒盛私有化買大開細
12月開始，對恒盛小股東嚟講呢個係壞日子，因為11月尾係大股東考慮提出私有化的死線，結果大股東無正式出價，代表建議告一段落，股價即刻插左三成幾。恒盛大股東想平買公司，結果拉鋸一番未成事，但相信小股東未必願意就此投降，O依家又要睇下一回合點鬥法。博私有化等如買大細，高位沽啲貨係買保險，如果有買保險，O依家就有子彈同大股東撐落去啦。
陸羽仁
金融High Tea 舊文
來源 source: http://hdfin.stheadline.com