智取大市：
Chok市炒股有法
■太航試過喺其他航運股唔跌之際，單日大跌，但好快又升番。 資料圖片
美股破頂下，港股高開完幾乎蒸發曬升幅，驟眼睇好似3次挑戰23000點失敗，實情似喺23000點形成短期上升三角形，未算差。美股嘭嘭聲升，港股二三線以至細價股炒風不絕，加上之前負面因素都
推唔低個市，要買大細博求其一邊，點都博開大先。唯一疑慮就係內地閂閘防走資，但港股成交不弱，唔似12月出事。
周三晚美股急升，港股先升後回，會以為港股弱到完全唔跟升。執筆未知周四美股升跌，但假如美股唔跌，周五港股又可能補番升幅。近期已經無限次同一種玩法，似乎為嘅係令到股民無所適從。要化解呢種幻覺，將股市分開三日三日咁睇，而唔係一日一日咁睇，會好好多。
換言之貨係要揸，好過出入太多，如商品股周三急升，周四回吐，資金就轉去炒煤炭股，但唔使好耐資金又番去商品股，chok住升。周四太航（2343）唔跌，中遠海能（1138）跌少少，但中遠海控（1919）無啦啦跌6%，唔使驚，皆因太航都試過喺其他乾散貨航運股唔跌時，自己單日跌到四腳朝天，但好快又升番，呢種情況可視為錯價，不妨撈貨。反而去到某兩三日，全體股份一齊喪炒，單邊咁升，反而係升勢末段，到時就係食糊時候。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com