異動空間：
大媽焗掃洛玻H
■洛陽玻璃H股昨日成交飆一成，股價隨時再有突破。 公司網頁
近排個市一字記之曰：亂。分開三個層面講：一、指數亂。幾乎日日高開低收，始終企唔到23000，A股被劉士余鬧到腳軟，騰訊（700）、友邦（1299）、中移動（941）三個大藥煲，得大笨象單天保至尊，
指數唔上唔落，期指戰友都話：玩死了！
二、板塊亂。今日炒嚇鋼、聽日掃嚇煤，航運急插又勁彈，弱咗兩個月的內房、玻璃股又忽然翻生；基建股連日下瀉，彷似一帶一路已經取消。追到氣咳隨時都係白做，想大包圍買曬等開車？哪有錢！三、個股亂。越南河粉炒上太空後急墜，半新股無厘頭亂舞，資金不斷換馬，全世界走短線，指數有升，但跌的股份總係多過升，揀股難，買市又唔得，的確人都癲！
異動股睇睇隻洛陽玻璃（1108），通告指已就重組方案達成初步意向，將獲母公司中建材注入合肥、桐成、宜興新能源的新能源玻璃業務。由於重組方案仍有待國資委審核，洛玻A股將繼續停牌不逾兩個月。不過，洛玻H股如常交易，最鍾意炒重組的北水大媽，只有焗住南下掃H股，刺激昨大成交急升10%，陰陽燭形成「早晨之星」的利好訊號，加上H較A折讓仍有八成，隨時進一步突破。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com