中環在線：
湯文亮寸過氣 劉智傑懶理
財經離不開股樓，股樓專家一街都係，言論夠爆自然引起迴響，好似匯豐銀行前副總經理劉智傑（劉Sir），佢上星期喺facebook撰文，指出樓市有爆煲隱憂，點知就被另一位樓市專家湯文亮寸佢係「過氣副大班」，好似唔多畀面。
華華日前終於搵到劉Sir，佢
氣定神閒咁話，如果其他人唔同意佢寫嗰篇文，可以不用理會，佢篇文只係寫畀信任佢嘅朋友睇！
咁又係喎，呢個社會言論自由，人人都可以係股樓專家，假如一直唱好或唱淡，總有一日會講中，湯文亮都係一篇「細價樓爆煲論」而人氣急升啦。
估樓市年半內爆煲
不過，今次估香港樓市可能於未來一年至年半爆煲嘅劉Sir都幾猛料㗎，佢曾經係匯豐最高華人管理層，紅褲仔出身，由低做起，主打零售銀行業務，九十年代成為匯豐首位華人副總經理，2000年退休後嘆世界。不過佢2013年復出，現任物流公司普匯中金（997）執行董事，可以利用佢專業發展供應鏈金融業務。
劉Sir最為人熟知嘅，就係對賭馬、炒股、佛學好有心得，亦都鍾意點評時事，近排間唔中喺facebook撰文，除咗點評股樓，亦有批評過城中大孖沙推出嘅劏房盤係為富不仁，內心仲有一團火呀。
佢同湯文亮都咁有heart，不如擇日一齊講樓市喇，淨係剖析點解咁多人排隊買富貴劏房都有大把人想聽。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com