財路：新天綠色博大翻身
■新天綠色能源董事長曹欣。 資料圖片
新天綠色能源（956）發咗2016年盈喜，業績大翻身之餘，有環保國策加埋主打地方因素，新天綠色有運行，PB兼且係同行最抵，博翻半番。
新天綠色係河北省最大風電營運商，同最大天然氣分銷商，兼踩埋城市燃氣零售同太陽能瓣數，講潔能瓣
數同規模，唔係削。新天綠色呢期埋發盈喜，估計上年全年盈利增長近兩倍。盈利倍翻，因集團運營風電場嘅運營容量增加，同區域風資源強過上年。
睇到係，新天綠色有靚仔成績單，完全關係到主打瓣數，而唔涉及到非營運性因素。又以呢個基準粗略計數，新天綠色預測PE，會由家陣過20倍，調整到得番7.6倍。
仲要咁睇，新天綠色主打地區係工業重鎮，內地霧霾嚴重，煤炭係其中主要汙染源頭，環保國策要低碳，但另一方面又要保持經濟適度增長，新天綠色主打瓣數同地區，就食正呢條水。
唔好計多，新天綠色今、明兩年EPS增長20%咁大把，到0.19港元同0.23港元，明年預測PE，跌到得5.3倍。新天綠色現價1.22元，比起2014年高位3.86元，累跌近70%，潛喺五年大底，場內專業預估，集團今、明兩年PB，得0.49倍同0.46倍！以風電瓣數計，市值或者級數近磅嘅協合新能源（182）同華能新能源（958），明年預估0.98倍PB、京能（579）預估0.83倍，又就算比起華電福新（816）0.51倍，新天綠色仍然至抵。
又同燃氣瓣數比，以當中明年預估PB比較平嘅北控（392，預估0.67倍）同港華燃氣（1083，預估0.7倍）比，新天綠色亦係平咗一截。
數咁計，新天綠色現價翻半番到1.83元，明年預估PB先得0.7倍，啱先追番上燃氣行家PB水位。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com