收市閒情：
當善款變擦鞋基金
「每5秒鐘，就有1個小生命無奈離世」，睇到香港救助兒童會（STC）一個又一個令人悲痛嘅故事，配以震撼嘅畫面，相信已令唔少人慷慨解囊。捐
錢當然係好事，不過背後佢不單抽起行政費，當中仲有啲錢可能已經成為「豪食Ritz-Carlton擦鞋基金」了。
上周二《蘋果日報》頭版報道，STC大花筒，每花費100元，只有67.7元作公益用途。機構當然例牌否認自己亂揈錢，不過事實係點？用一個例子答你！STC喺2016年底搞咗個籌款晚宴，當日星光熠熠，當然STC大金主徐子淇、大使甄子丹都有出席。
你可能以為慈善機構晚宴會場頂盡都係普通酒店宴會廳，咁你就錯了！當日晚宴假座Ritz-Carlton鑽石廳舉行！你又可能會話，係咪有酒店sponsor？不過據消息人士透露，STC的確曾經同Ritz-Carlton傾過sponsor，但酒店唔制。STC回覆指，「酒店以慈善優惠價出租場地，並豁免部份場地佈置費用。我們認為酒店是較適合的場地，而今次所籌得的善款數字，亦遠較過往多，證明這個決定是正確的」。
咁就要講多次，STC大金主係徐子淇，如果以商業機構去類比，徐子淇等同老闆。當然，徐子淇本人就冇要求要去Ritz-Carlton搞活動，之但係世上有唔少「識撈」嘅打工仔。
聽聞慈善晚宴當晚，加插一個超奇情嘅特別環節，就係唱生日歌！晚宴喺11月23日舉行，而11月29日就係徐子淇生日。明曬啦，聞說當晚救助兒童會總幹事方曉明，仲喺台上領唱生日歌。
消息人士就話，上星期報道一出，STC一日內就收到超多電話要求退回捐款；方曉明都趕緊救火，親自打電話畀唔少捐款機構負責人解釋，有收到電話嘅負責人就話，救助兒童會方面話香港人「記憶好短」，只要大家不再回應傳媒，就唔會記得。香港人冇錯係善忘，不過一個人或一個機構，只要衰過一次，都會喺Google「名留青史」。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com