中環在線：羅康瑞同侵侵有過節
怕入唔到境
■羅康瑞（左）噚晚話，相信特朗普會貫徹商人本色，就係反枱，不斷反枱。
「上海姑爺」羅康瑞舊年初曾經講笑話，如果特朗普（Donald Trump）當選美國總統，佢要移民去火星；事隔一年，特朗普真係成為美國總統，羅康瑞噚晚以貿發局主席身份出席春
茗時就話，相信特朗普會貫徹昔日商人本色，就係反枱，不斷反枱，務求獲得最大利益。
羅康瑞指，特朗普承諾減稅，令美國好多商人buy佢，近日佢又主動向中國示好，都只係商業手段，希望喺往後談判攞到著數，會否出現貿易戰，就要睇到最後，現階段其一言一行難以作準。
講到最尾，他又講笑話，唔好再講特朗普嘞，怕日後佢帶團去美國，冇得入境就慘！
羅康瑞對特朗普感覺咁差，當然有原因啦，話說特朗普曾經缺水，1994年搵羅康瑞、新世界發展（017）主席鄭家純等港商，投資喺佢位於曼克頓上城區嘅發展項目，特朗普佔三成，其餘七成由羅、鄭等人持有。
後來地產市道好轉，羅、鄭等人喺2005年將項目以137億元賣畀基金，特朗普冇耐就告佢哋，話佢哋冇事先通知、賣平咗，特朗普最終敗訴，雙方之後亦冇乜兩句。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com