內地水港股炒一轉
2017年02月10日
港股表面上睇升唔多，恒指只升0.2%，但國指就升1.2%，最值得注意係成交有959億咁多，唔再係得4、5百億成交咁死吓死吓，顯示有唔少錢在炒港股。
中環茶友話，依家炒港股主要係內地水，所以主要亦都係炒國企股，佢正在密切留意緊，國企股一個個
板塊咁炒完之後，會唔會開始炒到啲莊家股。
如果講個別股票，焦點係電視廣播(511) ，佢早前提出回購公司股份嘅建議，呢招竟然引來內企介入，話要收購佢主要股權，搞到佢昨日升左3.2%，升到30.6元。公司發表聲明，話收到一間名為傳奇影業及娛樂集團嘅公司函件，知會董事會就收購電視廣播29.9%已發行股份進行正式討論。由於公司唔知係乜來頭，市場嚇咗一跳。有大行就發表報告，話今次收購證明傳統媒體有價。
二仔底狙擊電視廣播
呢間傳奇影業忽然提出收購，講法係要先達成兩項條件，第一是電視廣播上月底宣佈，按每股30.5元回購最多1.38億股股份的計劃要遭股東投票否決；第二是交易要獲得通訊事務管理局批准。佢突然爆出嚟，大家唔知佢乜頭乜路，電視廣播嘅獨立董事柯清輝話，查過佢嘅底，提出建議嘅公司資本好細。
睇番佢嘅官網上載2015年國家主席習近平訪英國，公司亦組團高調訪問英國，後來仲講到要收購曼聯，一直只聞樓梯響，相比之下，佢話收購電視廣播，算係碎料啦。
有中環茶友話，內地有啲企業愛出風頭，乜都哄吓，假設有人提出話想收購電視廣播，再經本港傳媒廣泛報道，等如係免費宣傳，或者有利日後要嚟拉生意，正好好似李嘉誠出席公開場合，好多人鍾意走埋去博影相，礙於環境，首富有時都無奈同人合咗照啦。
呢啲公司底牌係二仔，充大個頭博吓偷雞，電視廣播咁多現金流入，如果偷到固然正，唔得都出吓名，花多少錢搵律師出吓信有乜所謂？
如果睇番電視廣播嘅回購協議，變相會令大股東增持，咁即係話幾大股東無意賣盤。
咁大家拗手瓜，做電視唔係買幢大廈，係需要管理技巧同眼光，咁呢間唔知乜來頭嘅公司係咪得㗎？從小股東角度，股價明顯升過30.5元的回購價，就考慮吓係咪趁高食胡，走番一轉。
電視廣播(511) 獲傳奇影業提購29.9%，股價升3.2%報30.6元。此外，傳有線寬頻(1097) 賣盤洽商進入尾聲，該股急升後回落，股價無升跌收報1元；九倉(004) 收跌0.09%報58.05元。
沾手落後中資股
電視港播嘅消息八八卦卦，顯示內地大大小小資金好想搞作嘅心態，呢個亦反映咗喺今個星期內資喺市場嘅活躍狀況，昨日個市雖然只係微升，恒指收報23525，升40點；但國企指數重上1萬關，收報10075，漲119點；紅籌指數收報3910，升29點。市場憧憬內地航運業復甦，航運股隨大市上揚，中遠海控(1919) 大升11.5%報3.31元；中遠海發(2866) 升6.%報1.75元；中遠海能(1138) 升5%報4.55元。
國指同紅籌指數明顯跑贏大市，市場有個講法係內資咁活躍，皆因有國企原本調咗錢嚟，計劃用嚟海外併購，但其後被外匯管理局叫停，變成「境外游資」，估計資金規模達百億元。這些資金既然短期內「出海無望」，部份向監管當局及母公司報告後，獲准入市吸納落後的中資股，但不准沾手細價股及衍生工具，且買盤必須循序漸進，以及避免頻繁進出市場，咁睇加埋成交增加，市底似乎唔會弱喎。
陸羽仁
金融High Tea 舊文
來源 source: http://hdfin.stheadline.com