【不問價追】醜股如何變靚（小炒王梁心欣）（第116期）
2017-3-16 17:00:00
華Dee 來了！我當日見到劉德華墮馬入院，仲擔心緊佢要休息半年以上，點知近來就莫名奇妙地在電視睇到佢出席活動，華Dee精神真是犀利⋯⋯點解講華Dee？因為一陣講隻股有點似，（其實
只是讀音有點似），先聽我講個故仔。
有一月尾到依家，我講得最多嘅一句，「咦！呢隻真係唔想買囉！衰咗好耐！」結果多次受到教訓，原來一直被視為炒唔起嘅醜股，喺2017年，都大大翻身，小炒王不禁慨嘆：「係咪要摒棄舊思想來擁抱新形勢？」好似玖龍紙業（02689.HK）、中國建材（03323.HK）、百麗（01880.HK）⋯⋯好多好多沉睡多年的壞孩子都醒來了，我仲拘泥什麼？
一隻$5.9上市的醜股，經營百貨、零售和超市，所有舖位都係自置物業（如果在香港真是發大達），多年前上市集資25億幾，現時市值34億，集資所得主要用嚟買地以及「起商場」。如果呢批物業喺香港會發大達，咁喺內地嘅升值潛力亦不容忽視，現時手持嘅資產已經超過一百億的佢，即係市值嘅兩倍，呢隻醜股就係華地國際（01700.HK）。
醜咗咁多年一定有原因嘅。華地以「華地」及「八佰伴」兩個品牌係江蘇地區經營百貨店業務，大約擁有10幾間百貨商店同16間超市。華地嘅負債相對較高，多過其淨資產，一旦要還債，佢就要好似之前啲上市公司咁出售資產解決，從而反映手上資產嘅價值。
早前相當多上市公司出售深圳嘅廠地來體現價值，即時令股價大升，如果華地真係行呢一招，相信沉寂已久嘅股價會有起色，想當年，大摩出過報告，話華地值$7.3，呢啲都俱往矣。但其實簡單地攞百盛（03368.HK）來比一比，業績虧轉盈，股價由低位攀升，相信大家都會見到醜女大翻身嘅情況。現時，或者處於＄1.5水平樓下，唔係想返上招股價，但沉睡後的甦醒，相信見$2都不是難事。華Dee，今次睇你啦！
不問價追 - 小炒王梁心欣 舊文
來源 source: http://www.winmoney.hk