智取大市：
二三線主力強股
■阜豐是內地味精龍頭。 資料圖片
美股回吐，港股冇跟跌，恒指小時圖已逐漸擺脫圓頂形態，二三線股連日輪流炒，整體市況已經早過指數一步重上升軌，信心快速回復，與其追住各個板塊輪流炒，不如分散三幾隻強勢股坐定定，然後且戰且走。
強勢股要數埋阜豐（546），內地味精
龍頭，食應商品、通脹概念，加上連同競爭對手梅花生物食咗大半個餅，行業寡頭壟斷更著數。同時有深港通概念，阜豐預測2017年市盈率9.5倍，遠低過梅花生物A股嘅19.5倍，估值大有條件收窄，難怪股價由2蚊升到5蚊都唔肯停。
阜豐上月發咗盈喜，預計舊年純利升八成，即係9.3億人仔左右，換言之盈利破曬頂，原因係收入上升加上玉米顆粒成本下降，同埋產能提升。舊年8月，阜豐喺山東斥資超過1.5億人仔買兩幅地擴產，睇嚟冇錯，進取嘅擴充策略，好景時絕對受投資者歡迎，因為收入增長有曬想像空間。
阜豐上月初突破5蚊之後，三連陰令股價跌一成左右，然後沿住保歷加中軸回穩，一輪整固後，股價成功收復5蚊大關，預計會有新升浪，中線首個阻力喺6至6.7蚊嘅港股大時代大成交高位範圍，等升到呢個位再說。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com