派獎金獎品贏掌聲
2017年03月24日
三月份係業績高峰期，股王騰訊公佈業績唔錯，但因為市場已take it for granted，預左增長強勁，股價回吐1%，係無乜其他好嘢下股價要下調消化，令到大市彈唔起。相反，個別公司係宣佈業績時，實行派獎金或派獎品，贏來市場一陣掌聲。
有息有升 無獎即插
騰訊公佈業績，去年全年股東應佔盈利410.95億元人民幣，同比增長43%，不過派送就無乜特別，股價係宣佈前炒左上新高，宣佈後無以為繼，腳軟下滑。佢嘅增長其實唔錯，大行對業績看法普遍正面，美銀美林及大摩均上調其目標價，股價跌低後有買盤支持，收市跌幅縮至1%，報223元。
呢期業績公佈，唔少公司有派送，本地藍籌有恒基(012) 同煤氣(003) 10送1紅股，四叔呢系近年鍾意送股，市場反應亦好，恒基前日逆市上升，昨日繼續造好，收48.9元，升1.8%，煤氣都突破左呢幾個月嘅阻力位15元，收報15.4元，升0.8%。除左藍籌，做便利店同餅店嘅利亞零售(0831) ，去年核心經營溢利增長左4.7%。公司除左一如往年派末期息13仙，仲因為現金儲備充裕，派發特別股息每股27仙。
講到派獎金同獎品，內地公司都唔失禮，有時佢地出手仲慷慨。之前神華(1088) 豪派500億股息，搞到股民雙眼放光，猛搵邊間公司係下隻神華，有人就估有好多現金嘅中移動(941) 。中國移動昨日揭開謎底，公司去年股東應佔利潤1087億元(人民幣，下同)，同比微增0.2%，每股基本盈利5.31元，末期息1.243港元。外界估中國移動會有獎金獎品，皆因公司現金流強勁外，今年仲係上市20周年。由於派送令市場失望，股價昨急挫3.4%，收報87.25元。
中移動董事長尚冰在業績報告就話，集團今年將迎來上市20周年。期間收入增長68倍，利潤增長24倍，市值增長13.5倍，言下之意可能係話咁對股東都應該有交代啦。
中移動上市20年，有中環茶友話呢段時間係買國企新股嘅黃金年代，無論中移動、國壽(2628) ，間間上市都倍數上升，而且好多時人人有份，小市民若然當年國企上市潮隻隻認一手揸到家，慳慳地隨時夠退休使費，所以真係no complaint。不過，中移動手頭大把水，若然趣趣地有特別息派吓等股東開心，咁仲very good啦。
中移動無聲氣派特別息，同係國企嘅中遠海運(517) 去年股東應佔溢利2.37億元，同比倒退30%，每股基本盈利15.47仙，但除左末期息5.5仙，另派特別息5仙，合計10.5仙。民企收租股SOHO中國(410) 同期股東應佔溢利9.1億元人民幣，同比增長70%，每股基本盈利17.5分，最正係有特別息每股派34.6分，管理層咁疏爽，股價即刻升左，收市報4.56元，升7.6%。
H股再跑贏大市
有啲派送好消息撐住，港股收報24327點，升7點；國企指數收報10487，漲30點，成交1035億元。恒生H股(2828) 微升0.48%，收報105.5元，中資金融股表現較好，建行(939) 、工行(1398) 股價微升0.6%。茶友話，通常業績好嘅公司會早啲宣佈，呢排公司出嚟嘅成績表唔錯，而且管理層肯派錢，相信陸續仲有啲公司咁做，咁樣市場氣氛會好啲，同時會有資金由公司流番市場。
呢排中字股有啲級級上，外資睇淡情緒都好似降低左。A股三度被指數公司MSCI明晟三拒後，將再就加入MSCI新興市場指數諮詢市場人士意見，結果在6月公佈。分析指，今次A股獲納入的機會偏高，呢次入摩成唔成事，可以話係外資對大陸股市睇法嘅風向標。
陸羽仁
金融High Tea 舊文
來源 source: http://hdfin.stheadline.com