中環在線：華置公告劉鳴煒係甘比繼子
■劉鳴煒有華置股息分，人工只係意思意思。 資料圖片
華置（127）大股東劉鑾雄（大劉）個仔劉鳴煒曾經因為擔任公司執行主席，年薪超過1,400萬元，喺上市公司富二、三代當中算係數一數二，但隨住佢2015年底辭任行政總裁兼轉做非執行主席，話明係非執行
，工作量自然大減，人工亦要跟住大幅調整，結果佢舊年全年只袋30萬元袍金。不過，大劉上月分身家後，劉鳴煒揸住華置近25%股權，係有股息分嘅，人工都只係意思意思。
市場原以為劉鳴煒一定接棒打理華置，點知佢好似鍾意處理本港青年事務多啲。佢2006年開始做華置董事，2014年升做主席，兩年唔夠就轉做非執行主席，早前大劉接受訪問時，被問到想唔想阿仔做未來接班人，佢都話唔知道阿仔有冇興趣。
甘比家姐任華置總裁
華置家陣可以話由大劉太太甘比嘅家姐陳詩韻負責，38歲嘅陳詩韻2012年做華置執董，前年底接任行政總裁，不過相對而言，呢位上市公司行政總裁嘅年薪又唔算好高，舊年年薪144萬元，除開月薪12萬左右。甘比細妹陳諾韻32歲，同樣係前年升做執董，年薪58萬元，除開月薪4.8萬元。
講開又講，華置最新呢本年報都幾update，update曬董事之間嘅親戚關係，例如寫清楚陳詩韻係劉鳴煒姨媽，又寫明劉鳴煒係甘比繼子。37歲嘅甘比只比劉鳴煒大一歲。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com