細劉賣利福地產有交代
2017年04月21日
恒指在復活節假後插咗兩日，昨日在騰訊(700) 帶頭下，升231點，上番兩萬四。港股主要在3點內地收市後抽高，外圍歐洲又呆呆地唔係有乜好消息，本地升市成交得684億唔算激動，不排除係大戶見跌得多夾吓淡倉，炒一個鐘就夾到淡友打靶。
如
果呢個邏輯係啱，咁今日都未必再升得幾多，由於港元較弱，北水又唔來，外資都對呢兩個月後市睇番淡少少。
瑞信睇大市仍受壓
例如瑞信就話市場對於內地宏觀環境放緩及流動性收緊的憂慮升溫，中港股市未來一至兩個月會繼續受壓。
瑞信話內地流動性收緊是出於中央反貪腐及金融業監管收緊，佢哋發現個別私人基金的資金為避開政策風險，之前已撤離股市。至於其他資金，例如由信託及銀行外判所管理的理財資金，亦因當局監管限制增多而開始收緊。瑞信直言，市場流動性收緊的局面會維持多久難以預測，但估計中港股市未來一至兩個月仍會繼續受壓。
但若以今年計，瑞信對中港股市全年表現看法正面，話仍有上升空間，主要是內地企業盈利增長支持。雖然市場擔心中國宏觀經濟情況，但該行未見經濟出現放緩訊號。多項數據如中國GDP、內房銷售及固投等，均略勝預期，故相信在經濟環境穩定改善下，企業盈利增長會支持股市上揚。
換句話說，最好望呢兩個月大市調整多啲，然後吸納番啲優質國貨股。
如果睇番個別股份，昨日比較激動的係騰訊，昨日收236.6元，升2.8%。呢隻科技股王，睇淡佢好易瀨嘢，如今升到48倍PE，仲好似唔想停咁樣。由去年12月低位179.6元計，升到如今升咗32%！
炒騰訊等下一次大回吐
去年11、12月騰訊一浪向下，主要同特朗普當選有關。特朗普鍾意舊經濟，唔愛新經濟，佢上場時美國的科網股巨頭都嚇咗一嚇，騰訊亦跟住回落。不過隨著特朗普的政策唔係幾靈，例如想過醫改法案都過唔到，市場對佢信心減弱，倒過頭來對科技股信心返晒來，騰訊亦借勢炒上。
B.A.T.(百度、阿里巴巴、騰訊)係內地三大科網股巨頭，實力無得懷疑，只有騰訊在港上市。我有一個技術分析，睇番過去3年，騰訊幾次顯著回吐，短者跌2、3個月，長者如2014年跌5個月，回吐幅度由14%至27%。如果睇佢基本因素無大變，想炒吓呢隻大股，下次見佢回落3個月，從高位下跌幅度多過15%時，可以開始分段吸納，博佢仍然在一個長線上升周期中，深度回落後可以再上。
細劉劉鑾鴻的利福地產(2183) 早前宣佈，賣盤予福州內房商林榮濱。林榮濱出價12.93億元或相當於每股5.18元，收購利福地產59.6%，並按每股5.18元提出全面收購，較公司停牌前報價4.95元溢價4.7%。利福地產昨日復牌，曾升至5.21元，收5.15元，升4%。
成個交易似連殼將生意賣走，以收購價計作價21.7億，相比公司資產淨值14.8億，收購價減資產淨值差額6.9億，可以睇成為殼價。
陸羽仁買股長揸，要睇大股東對小股東有無交代。細劉在2013年9月將利福地產由利福國際分拆出來上市，上市價1.98元。上市之後三年只係2015年賺過1724萬元，其餘都係蝕，生意麻麻地，當然亦唔多派息。不過細劉搵啱機會將公司賣走，仲有全面收購，小股東揸3年半回報有162%，真係相當唔錯，算做對小股東好有交代啦，可以畀個like佢。
陸羽仁
金融High Tea 舊文
來源 source: http://hdfin.stheadline.com