收市閒情 - 千頌C 2017年5月24日
收市閒情：投行都開唔到戶口
■喺滙豐開戶口有幾難？難過登天。 資料圖片
以下，係一個悲慘故事，更悲慘嘅係，呢個係一個真人真事……
我大大話喺投行界打滾N年，咩風浪未見過，金融風暴、金融海嘯，關關難過關關過。但過去幾個月，可算係我入行以來，遇過嘅難關頭幾位，就係我間投行開唔到銀行戶口！
話說，我間行，一間歐資大行，就睇好香港市場，於是派我喺香港做開荒牛，開拓嚇新市場新業務啦。即係咁，要賺到第一桶金，最重要係咩？係要有銀行戶口。
「唔好意思，我係代表我間歐洲XXX銀行嚟開戶。」我挺起胸膛，昂首闊步行入滙豐，點知「唔好意思，先生，你要打去呢個電話，會有同事幫你。」大家都是行家，有電話專人Serve係應該嘅，我微笑接過單張。Oops！當我睇到三隻字，我知我錯了！呢個電話，原來係「中！小！企！」熱線！
「小姐，你係咪搞錯咗，我哋係歐洲大行，你開Google睇嚇，上市公司嚟，我真係要打去呢條Hotline？」「係呀，呢度我哋冇人幫你做到，你打去啦。」係咪發神經？我啲客，單係開戶閒閒哋幾千萬，我間行市值億億聲，你當我哋中！小！企！？
算，打咪打，鬼叫我要開戶，如是者，我死死地氣，代表我間歐資大行打去中小企熱線。幾經辛苦，終於有真人接聽，「我代表XXX銀行想開戶」然後一把機械式，操純正廣州腔廣東話嘅CS，機關槍式問我一輪問題，「係咪秘書公司？公司咩形式註冊？公司全名？業務性質？」
撻得個朵，你唔會又唔幫我開戶啩，話曬，我哋都係市值億億聲、歐資「唔好意思，由於你間公司未營運，同埋未有牌照，所以現階段唔會同你開戶，到你開業先再搵我哋啦。」「我係XXX銀行喎，你唔幫我開戶，我點開業，我開到業，我就唔使你開戶啦？」「唔好意思，我哋幫唔到你……拜拜」
香港，國際金融中心，全球最自由經濟體，但我實在估唔到，作為一間歐洲有名有姓品質保證嘅大型銀行，都會開唔到銀行戶口，最令我讚嘆嘅係，居然係俾「中小企中心」Reject。
於是我放棄滙豐，我向其他行問，幾經辛苦，花盡我三吋不爛之舌，終於中銀（2388）肯同我開，不過，人生哪有盡如人意，有咁順景嘅，因航（293）就唔係因航啦。
「先生，我需要你公司管理層嘅證件同埋住址證明」What？我點問我老細拎住址證明？即係咁，你會唔會走去問歐智華，「Excuse me？啲人唔信你住呢度，畀你個住址證明我please？」
最後排除萬難，我終於Fight到唔使交住址證明，至於個Passpost，我另外要搵公正行去證明一張。我唔明，我好唔明，點解連香港政府監管機構都認受嘅證件，反而監管機構轄下嘅銀行唔承認。
最後，為開一個戶口，我不停俾歐洲嘅同事恥笑，如事者，搞咗幾個月，我間銀行終於開到銀行戶口。
過程中我得出一個結論。就係希特拉處理唔到嘅事，已經唔再係Cut有線（九倉都Cut到啦，仲有邊個Cut唔到），而係希特拉都開唔到銀行戶口。
千頌C
http://www.fb.com/winbigwok
本欄逢周三刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
千頌C
收市閒情 - 千頌C 舊文
來源 source: http://hk.apple.nextmedia.com