科技股難逃地心吸力
2017年05月24日
港股昨日再升11點收市，但與其話係升市，不如話個市想跌跌唔到，皆因整體大市有啲乏力，只係靠幾隻大股撐住，個別股份仲俾人狙擊碌低O添。
通達大股東發出到價訊號
呢排手機設備股同科網股陸續成為沽空對象，昨日輪到做外殼同防水設備嘅通達(698
) 俾人洗倉。有傳係因為內地手機生產商定單減少，令佢股價受壓，公司方面就回應話未知乜事，仲表明若然情況合適會考慮回購。
呢一波手機設備股同科網股嘅狙擊，唔係突然發生，係有因有由。上個星期，通達大股東配股，同一日呢個板塊嘅龍頭瑞聲科技(2018) 就俾沽空機構葛咸城發報告狙擊，兩隻股份雖然市值大小有別，但走勢相似，都係去年起步急升。
通達你咪睇佢股價唔貴，佢由去年1.3元左右起步，升到而家市值有145億，以佢早前高位3.1元計，市值接近200億元。
通達本來生產膠瓶為主，後來轉型做手機設備生產，公司生意大增，但股價累積升幅大，回吐壓力已經唔細。
上個星期大股東走出來配股減持，咁即係畀左個訊號空軍，大股東都覺得差唔多到價，如果你要沽空，咁你會唔會出手呢？
通達而家話俾人抽單，消息唔知真唔真，以佢歷史市盈率13.6倍，息率仲有2厘多啲，如果你話佢係增長股就唔算貴，但若然當作工業股收息，咁就唔平，關鍵大股東配左股，睇淡佢嘅人睇準市場流通量多左，要撐股價就唔係咁易。公司而家話考慮回購，不過，既然大股東早前自己都減持，而家用公司錢回購，咁又買得幾多、推得幾高呢？
老實講，公司股票炒得高，若然大股東唔套現，咁只係帳面富貴，有得睇無得使，有時陸羽仁都體諒大股東抽水嘅心態，只不過大股東減得磅，自然吸引其他淡友嚟搵食，走唔切嘅小股東就唯有捱價。
睇番呢一輪嘅沽空潮，好多集中喺科網股，宏觀啲睇，已反映左呢個板塊整體已經炒得高，所以吸引專業炒家落食狙擊。上個星期瑞聲俾人狂插，陸羽仁已經響起警號，話呢個板塊有壓力，周一開市輪到內地科企科通芯城(400) 中招，昨日到通達出現第二輪洗倉，短期之內，估計呢類股份氣氛都唔會太好。
美股上升無力未跌得
本地科網同手機設備股表現突出，同外圍科技股走強好大關係。美國納指穿破左六千點關口，蘋果、阿馬遜紛紛炒上，帶動埋本港嘅相關股份，但最近美股有啲唔上唔落，納指五大股份都係唔上唔落，蘋果想炒佢出新手機，但好日子總係未定，仲時不時傳出押後。科技股難逃地心吸力嘅影響，港股就變成由騰訊(700) 頂住，想跌唔跌得，但就無乜熱炒氣氛。恒指昨日收報25403，叫做係升市，報高左11點；國企指數收報10395，都漲左20點，成交有845億元。不過，騰訊創新高280.6元後都無力，收市倒跌，收報275.2元，微跌0.07%，個市有得升都係靠落後嘅中資金融股，周初表現向好嘅內險股續挺，中國平安(2318) 升0.62%，收報48.5元；國壽(2628) 漲0.8%，收報25.05元；招行(3968) 大漲近4%，收報22.8元。澳門4月份入境旅客按年升11%，加上多家大行唱好澳門博彩收入，濠賭股普遍上升，銀娛(027) 升4%，報42.8元，為表現最佳藍籌股；永利(1128) 升3%，報17.06元。控股股東有可能出售全數股份的新濠環彩(08198) 更急升25%，報0.43元；新濠國際(200) 跟升近9%，報19.6元。
陸羽仁
金融High Tea 舊文
來源 source: http://hdfin.stheadline.com