金手指：
7.1後金融風暴？
■林鄭月娥即將上場，上台會否面對一場新的金融風暴？ 資料圖片
周末，孫柏文拜讀每周必睇，股榮兄撰寫嘅「趣BLOGBLOG」。文中，講到香港因聯滙，所以長遠必要跟美國息口走勢。佢升，我哋又會升。
文中亦有話𠵱家香港人買樓最鍾意嘅HIBOR（香港銀行一個月期
同業拆息）掛鈎按揭，係落後美國唔少，不過一旦升大家小心。呢點，我不但完全同意，仲要加多句就係HIBOR要追番美國水平，可以好快好快。舊年年尾已經做過一次預演。
當美國𠵱家每12個禮拜加0.25厘，舊年年尾，HIBOR喺一個月多由0.38厘升至0.75厘。而喺十幾年前對上一次加息潮都係一樣，HIBOR一路唔跟，一跟就爆升，幾個月內HIBOR係厘厘聲咁升。發生喺今日的話，可令香港樓市即冰封，就算價唔跌，成交跌到近零。你想賣都冇買家。
咁同今日條題又有咩關係？早喺2016年年初，我為當時仲未遠走美國嘅林依麗網台做節目友情客串嘉賓，其中有集我預言過話2017年當選嘅特首，一上台後冇耐就會面對一場金融風暴。亦會有銀行面對擠提衝擊。而到時政策嘅應變，就會決定我哋香港一國兩制死亡日。因如果被衝擊嘅銀行真係資不抵債，不過政府話包底，而唔係跟個50萬賠款上限，咁就真係一舖清袋，兼要搵董建華求中央打救。到時學2009年愛爾蘭咁被剝自治權。而如果政府到時真係包底，你真係要趁機會抽錢走，因學愛爾蘭咁，會係尾班車。
仲有幾日，新任特首林鄭月娥將會上場。我就一定畀機會佢，不過唔會有期望，咁就唔會失望。
孫柏文
獨立股評人
http://www.fb.com/shuen
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
孫柏文
金手指 - 孫柏文 舊文
來源 source: http://hk.apple.nextmedia.com