中銀香港有故講
2017年06月27日
中港股市同步向好，港股升勢仲多啲啲。踏入七一回歸二十周年前夕，國家領導人習近平會來港消息公佈。一般估計大市係呢段時間就算唔會大好，至少都應該穩定啲，可能因為咁，港股就升得多過內地啲啦。
內地A股昨日表現唔錯，主要係內房股向好，萬科A股升左幾
日之後停左牌，但無影響大陸股市表現，結果上證指數收報3185點，升27點或0.87%。深證成指收報10537點，升170點，創業板指就收報1821點，漲13點。港股尾市曾高見25875，最多升205點，只係成交未配合，恒指收報25871，升201點；國企指數收報10530，升100點，成交金額682億元。
領導人訪港刮起帶路概念
摩笛吹升中銀香港，大摩預期中銀香港可受惠於淨息差擴闊，維持「增持」評級，並將其目標價由38元上調至46元。中銀香港周一股價曾高見36.95元，創新高，收升6.35%報36.85元，成表現最佳藍籌股。其他本地銀行股亦造好，創興(1111) 升1.8%報16.48元；渣打(2888) 、東亞(023) 升0.75%；滙控(005) 升0.52%報68.15元。
中銀香港(2388) 昨日再創上市新高。本地銀行股佢係最強勢嘅股份，過去幾年中銀分別出售南商同集友股權套現，所得除左部份用嚟派息，跟住就用左嚟收購同發展。副董事長兼總裁岳毅昨出席活動時就話，中銀香港正加快從城市銀行向區域性銀行轉型，打造東南亞區域總部和中國銀行(3988) 的航海旗艦，為「一帶一路」、人民幣國際化、粵港澳大灣區建設等重大戰略提供更好支持。
岳毅嘅講法當然政治正確，對小股東嚟講最重要係政治正確外點樣搵到錢。帶路概念覆蓋好多國家，大家最驚係去呢啲國家投資變成送禮，所以點樣揀投資目標先最重要。依家帶路國家個別都有啲商機，好似泰國對中國提倡帶路反應頗為正面，而係新國王上場，加上軍政府控制左政府後專注經濟，投資者開始睇好當地發展，中銀香港早前係區內進行收購同搞區域銀行，就變成一個有執行性嘅概念。由於佢嘅增長古仔唔錯，係領導人話嚟香港之際，佢就乘勢創埋新高。
不過，中移動(941) 曾低見83.05元，創一個月新低，收跌0.36%報83.1元；昆侖能源(135) 跌0.45%報6.58元；恒安(1044) 跌近1%報收59.5元；蒙牛(2319) 更走低1.43%報15.22元，為跌幅最大藍籌股。
I.T.變大陸消費股
早排手機設備股被沽空機構狙擊，從事中高端攝像頭模組、指紋識別模組的設計、研發、生產和銷售宣佈盈喜嘅丘鈦科技(1478) 升左9%報7.57元。丘鈦科技(1478) 發盈喜，與2016年同期相比，預料截至2017年6月30日止中期業績，股東應佔綜合溢利同比增長可能超過100%。盈利大增主要由於攝像頭模組銷售數量同比穩步增長；攝像頭模組的產品結構優化明顯致使攝像頭模組平均銷售單價同比明顯提升；及指紋識別模組的銷售數量同比大幅增長。丘鈦有多種生產用原材料均由境外採購並以美元支付，銷售收入大部份就以人民幣結算，因此匯兌都有收益。佢而家市盈率37倍，股息率只有0.5厘，估值係一隻增長型公司，盈利對辦咪有得炒吓囉。
呢排個別零售股造好，都係有增長故事講吓，I.T(999) 係業績公佈透露， 在中國的總銷售面積較去年增加18.2%，在中國的自行管理店舖版圖至今已覆蓋28個城市，而且盈利遠超香港。係業績公佈後，投資者視佢為大陸嘅新興消費股，令佢股價可以跑贏本地其他消費股。
陸羽仁
金融High Tea 舊文
來源 source: http://hdfin.stheadline.com