財金冒險號：葉劉辣招行唔通
■葉劉淑儀獻策冷卻樓價，但建議內容太天真。 資料圖片
樓價升唔停，人人化身樓評人，睇好睇淡各有理據，只有時間能證明誰是誰非。最高難度嘅樓評，係提出冷卻樓市嘅建議，一係招數無用，正如政府出咗咁多「辣招」，反被指推升樓價、益咗發展商；建議有用嘅話，就有政治阻
力，例如開拓郊野公園以增加供應，或停止每日輸入150個內地人以減少需求。
政客葉劉淑儀偏向虎山行，最近投稿網媒，話「只要使出兩招行政措施，必可冷卻樓價」。
第一招係公開賣地嘅投標價錢。按葉劉嘅邏輯，咁就可以壓低地價，言下之意係樓價都會跟隨下跌。「麵粉價低，麵包就會平賣」咁嘅童話，今時今日仲有人信？睇嚇頻頻誕生地王嘅啟德，嘉華（173）喺2014年初以每方呎樓面地價5,330元投得其中一撻地，平喇啩，發展成「嘉匯」，今年2月推售，折實呎價1.7萬至2.3萬元！
第二招係學內地推限購令。內地調控咗樓市都好多年，一樣越調越升，喺香港複製難保有效。更可笑嘅係，葉劉提議「禁止發展商興建納米樓」。同某啲政客嘅「全面取締劏房」建議一樣荒謬。有頭髮邊個想做癩痢，有錢邊個想住納米樓？沙田上車盤河畔花園242呎單位新近成交呎價1.8萬元，貴過太古城。杜絕納米樓，只會減少細單位供應，令上車盤更加離地。
究竟葉劉係真naive，相信以上措施有效，定係假天真呢？
笑笑生
http://www.fb.com/sneeringman
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
笑笑生
財金冒險號 - 笑笑生 舊文
來源 source: http://hk.apple.nextmedia.com