中環在線：大廈重建 來佬餐館搬竇
■「來佬餐館」由羅雪儀打理，噚日貼上告別公告。 李潤芳攝
中環人本月底將會少一個地方食飯，事關業主要收舖將大廈重建，位於威靈頓街嘅「來佬餐館」做埋本月21日就關門大吉，搬過去灣仔。
來佬餐館由南華前足主羅傑承嘅女兒羅雪儀（Cherry）打理，旗下仲有
RedMR、大官廳、上海佬餐館等。聽Cherry講，來佬餐館喺中環開咗6年，早幾個月佢打算搵業主傾續租，點知業主話要收舖重建大廈，佢大感無奈，惟有即刻周圍搵舖。
雖然話經濟冇咁好，但要喺中環搵一個3,000、4,000呎嘅舖都唔係咁易，仲要租金合理呢，最終Cherry就決定將來佬餐館搬落灣仔，將灣仔嘅上海佬重新裝修，改為有100個座位嘅來佬，預計本月底開張。
羅雪儀試菜多咗拜拜肉
今時今日，乜都要相機食先，有新餐廳開業，Cherry當然要幫手諗新菜式，日食夜食，佢笑住話，食到手臂多咗拜拜肉。
而佢諗到嘅一道新菜式，唔止相機食先，仲要「拍片先」，呢道菜名為「梳乎厘焗咖喱飯」，撥開梳乎厘見到有煙，先至睇到入面嘅飯，拍片效果一定好過影相。Cherry畀華華睇過條片，都幾過癮，真身就要等餐廳開張了。
Cherry希望繼續發展來佬呢個品牌，喺中環搵舖之外，亦諗緊租商場舖，仲呼籲商場業主接洽㖭呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com