收市閒情：新盤與妖股分別
■新盤同妖股唔同之處係妖股冇息派，新盤起碼有租收。 資料圖片
成功Sell到嘢，首要係咩呀，係包裝！「先生，今日你遇到我，係你好彩啦！隆重推介新盤城．點，聽個名就知冇老點。」呢個西裝友西裝骨骨，注定俾我屈！
「過主啦，哪有錢？你……」
「你聽埋我講先問候我
媽媽啦，呢個盤入場費，三球有找！唔係講笑唔係搵笨，最平279萬銀鬆就有層樓。按揭唔使驚唔使騰，發展商按揭唔使出動住，單係用按保，就已經做到八成按！個盤英文名C、O、O，真係一聽就知氣勢高！仲有仲有……」作為一個資深經紀，我好有信心，我呢一輪機關槍式街市推銷Mode，冇咩人能夠抵抗，除非……呢個人好醒……
「夠啦夠啦，講完未！你話『三球有找』好抵呀！」西裝友竟然扮我個Tone！「抵你條命！你呎價幾多？萬七幾銀呀！！表面就入場費平，其實每股就貴一貴，就好似一隻股咁，拆細咗一手係少錢咗呀，但有平到咩？以前騰訊（700）500蚊呀，𠵱家300幾蚊咋，你唔通同我講騰訊平咗呀？」呢位阿生，原來係炒股能手，正當我想反駁時，佢竟然繼續……
「你仲好意思提發展商按揭！即係咁，你借孖展炒股，你都係同經紀借，係Third Party，但你同發展商借按揭，即係咩呀？等如你向大股東借錢買佢出嘅股票呀！莊又係佢，大耳窿又係佢，即係通殺呀！慘得過𠵱家唔少人知道個盤有發展商按揭仲要大叫『謝主隆恩』。知唔知呢啲局只有一個結局？大股東要你三更死，不許老散留人到五更！」
「知唔知香港地產界最難頂係咩？係啲盤名！你又咩咩戀，佢又C咩O，大佬呀，溝埋叫『與COO談一場驚天動地海之戀』吖笨。知唔知啲咩股先要改啲咁奇怪嘅名……就係妖股！」佢鏗鏘有力地講完「妖股」呢兩個字，就絕塵而去。
而我，今日俾人當頭棒喝一嚇之後，就戇居居企喺原地。我內心真係好想同佢補充一句，「妖股同新盤係唔同㗎，妖股冇息派，新盤起碼有租收，所以結論係，寧買新盤，勿買妖股。」
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com