智取大市：吉利模式潛力股
■重汽有上調盈測條件，有機會被大行選中，loop一次吉利嘅上升模式。 互聯網圖片
6個交易日之內，爆出小股災之後，喺人行預告降準之下，港股噚日又大升市，短線最大關口係擴散三角形阻力線28360點左右，明顯突破先係真正癲市。喺長線值博率不高、由情緒主導後市嘅情
況下，入得嚟賭，都要揀啱賭枱（板塊），再揀啱Number。
恕小弟對於噚日最強嘅內銀股冇乜好感，請各位搜尋舊文搵原因，而內銀股大陽燭後往往無以為繼，呢個板塊爆升，反而會造起港股個勢，益咗隔籬啲同學仔。選股其中一個準則，係過往一個星期一直保持強勢、股價亦喺噚日大升市率先破頂，證明無論升市又好、唔升市又好，買需一路存在，呢類股嘅升勢有條件持續落去。
之前講過，中國重汽（3808）半年收入增長73.7%之下，行政開支僅升16.7%，同時財務費用下跌，經營槓桿效應令盈利增長接近5倍，每股盈利51分。《彭博》綜合分析員預測下半年每股純利27分，較上半年減半咁滯，收入亦較上半年跌一成，可見盈測非常保守。有見及吉利（175）畀大摩唱好調升目標價，股價升到九里遠，大行玩法再loop一次嘅話，重汽大有上調盈測條件，有機會再成為被選中的細路。
晉佳
fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com