收市閒情：輕鬆學懂何謂底氣
■林鄭輕鬆教識港人何謂「底氣」。 資料圖片
林鄭喺國慶酒會上致辭，「底氣」呢個詞一次唔夠，就用夠兩次，彷彿係同你班香港人講，「我知你哋唔識呀，你咪鬧囉，越鬧就越多人講，𠵱家大家輕鬆學識呢個生字，大家跟我讀一次，d𥮴 q𦱿！」
其實要洗香港人腦，曲線做國民
教育，令中港文字融合，咁樣博鬧當然做到個效果。要教香港人「底氣」呢個字而冇人鬧，好易㗎咋。
林鄭下星期三公佈上任首份施政報告，政府放風「首置上車盤」，鎖定過咗居屋申請資格嘅港人，即係入息限額5.2萬至7萬元。當然最緊要係睇轉售限制，10年內你可以原價轉售政府；10年後就可以補地價，喺自由市場出售，至於補地價金額，係以買入時計，而非市價。
喂喂，咁呢個著數呀！如果呢10年樓價升，咁就發啦，平補地價，用市價轉手就賺一截；咁如果樓價跌呢，你咪原價賣番畀政府，你首先就已慳咗租金，當然你都有嘢輸，你供樓都要利息，仲有就係供樓嚿錢嘅機會成本。不過假設樓價真係插水，即係呢段時間你投資咩都會輸，反而你將呢嚿錢鎖喺層樓度，由政府幫你保本，仲有著數！
橫睇掂睇，如果抽中「首置上車盤」，就咁聽落都係著數。如果我係林鄭，呢個時候「底氣」呢個Term係時候出場啦：
「我明白，磚頭，係香港人抵禦風浪、戰勝挑戰的底氣所在。所以，冇錢買居屋，又上唔到車嘅中產朋友，你哋有福了！首置上車盤，唔敢講係逼你發達，但最少你保本之餘，仲有機會賺到錢。我相信，只要有樓揸手，行出街你先會深刻感受來自業主專屬嘅底氣。」
文化統戰唔可以夾硬來，正所謂剛柔並重，好多香港人都太簡單啦，有著數嘢有樓揸手？我話之你講底氣、沼氣定斷氣。
講到「底氣」，根據百度百科，係指的是人基本的信心和力量：「只要心中有底，不論你表現得多麼謙卑多麼客氣，別人都能感受到你的自信。這種表現就是一種底氣，財富、學識、家庭背景、專項技能這些通通都能成為你的底，並產生底氣。」講到尾，即係一係有料，一係有錢，就算幾謙卑，對方都會感受到你嘅霸氣。林鄭話，「深刻感受來自國家的底氣」，中國，有謙卑過嗎？
千頌C
fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com