Can Bank：新股炒爆四指標
■雷蛇有超人概念，為近期焦點新股之一。圖為創辦人陳民亮。資料圖片
近期新股市場熱鬧，先有三馬概念的眾安（6060），至於騰訊（700）親生仔閱文（772）仲誇張，散子身邊唔少朋友都孖展成球成球咁入，有唔係炒開股票嘅朋友都孖展五球，大家對閱文
掛牌後升幅零懸念。
嚟緊焦點新股就係超人概念電競股雷蛇（1337），雖未有盈利，但概念嘅嘢，盈利一向唔係指標，熾熱度相信都唔會太弱。新股短炒一向只睇供求，不過，熱潮幾時炒爆，有啲指標就要留意一下。
第一：加價！尤其是已經公開曬招股價範圍嘅新股，即係突然要延遲上市日期，上調招股價範圍，方便cap更多水。根據過往經驗，呢樣都唔係好兆頭。
第二：做傳統行業新股PE奇高！公司上市就係為集資，如果大家同期上市，唔少公司都會參考嚇其他定價如何，咁就難免會出現「佢個定價定到咁高，點解我間公司唔得」嘅情況，結果就會有傳統行業股都有70-80倍PE。金融海潚時就有一間內房股以逾70倍PE定價，你問佢點解會定咁高，佢一定係話盈利係未來，下年嘅PE降到xx倍，但結果係隻內房股咁多年來都未浮過上水面。
第三：大市有見頂跡象！尤其是環球經濟已經有跡象轉差，大市衝極都衝唔上，但新股市場氣氛仍然熱烈。
第四：《蘋果》A1！呢樣大家《蘋果》讀者都明，唔使花時間講。
散子
散子
Can Bank - 散子 舊文
來源 source: http://hk.finance.appledaily.com