宏橋爆升反狙擊
2017年10月31日
美國科技股上周五造好，港股因為閱文(772) 招股凍結大量資金未能追上，恒指全日冇神冇氣，收報28336，跌102點；國企指數收報11563，下滑80點，成交1038億元。
雷蛇凱知樂有啲冷味
港股呢排聚焦新股，繼閱文外，本周有兩隻新股都受注視。一隻係全球最大電競
品牌雷蛇(Razer)(1337) 。該公司將發行10.6億股新股，國際配售為90%，公開發售為10%。招股價介乎2.93元至4元，集資31.16億至42.54億元。每手1000股，入場費約4040.3元。另有15%超額配股權，令集資可增至35.84億至48.93億元。公司引入五個基礎投資者，涉資1.53億美元(約11.9億港元)，未計行使超額配股權，相當於集資規模28至38%，有六個月禁售期。
雷蛇之前傳出上市消息，但具體冇訂日子，公司決定11月1日至6日公開招股，時間都嚟得幾急。若然用實資申請閱文，未必趕得切回籠，就連孖展都有啲緊張，令拆息高踞不下。
宏橋生意實淨有力反攻
另一隻新股係中港銷售樂高(LEGO)嘅凱知樂(2122) ，佢嘅概念無科技股咁煞食，但都有著名品牌撐腰，加上大陸開放一孩政策，俾人一啲幻想空間。佢哋唔理閱文吸資大法照上市，變成有啲偏冷味道。有中環茶友就決定冷熱都申請番啲，博吓冷門會唔會有好分頭，間接提高派彩。
停牌七個月嘅全球大型鋁產品加工商中國宏橋(1378) 噚日復牌，佢哋之前俾沽空機構Emerson發咗份負面報告搞到停牌，Emerson見宏橋復牌再發第二份負面報告狙擊。公司午後發通告反駁話，董事會堅信有關報告所含質疑屬誤導、唔真實兼冇事實依據，相關反駁已經喺上周三(25日)通告澄清。公司董事認為，Emerson對公司同聯屬公司反覆攻擊係惡意，已經正式喺香港法院對佢提出訴訟。
睇番中國宏橋復牌前公佈截至舊年全年業績，純利68.5億元人民幣，按年勁升85%；每股盈利0.96元，派每股末期息27仙，另派特別股息20仙。
宏橋股價噚日急彈32%，收報9.3元，似乎市場唔係咁聽沽空機構支笛。現價計市盈率唔夠9倍，息率有5%，沽空機構隨時俾佢夾死。
我有時覺得啲沽空機構有啲離譜，先沽貨再出負面報告，有時散戶細膽一窩蜂去跟沽，股價暴跌銀行收水，公司可能因為資金周轉失靈玩完，唔係因為份報告啱。我睇宏橋嘅生意比較實在，所以可以大力反擊。
樓價破頂 地產股照跌
由於市場焦點去咗新股，現貨市場都靜咗落嚟，特別係新股孖展扯高咗拆息，令到地產股喺新盤熱銷下仍然受壓。
十月份過去，市場埋單計數，估計今年累積賣咗近二千億元新盤，當中最多係新地(016) ，另外長實(1113) 舊年因為好多盤攞唔切售樓紙，變成今年賣樓量激增兩、三倍，其他主要發展商賣樓都有唔同程度增長。
喺旺場嘅同時，最近都有唔少破頂個案，將軍澳嘅晉海I期極高層四房戶，面積1066呎，未開售就加價100萬元，仍然以2200幾萬元售出，呎價近21000元，係日出康城區內呎價首次突破2萬元。
雖然樓市咁熱，但地產股不升反跌，新地噚日收跌0.9元，報127.7元；恒基收跌0.55元，報50.6元，股樓背馳，只能解釋係經濟向榮，利息堅挺，好似對利率較為敏感嘅美國兩年期公債收益率觸及九年新高嘅1.6275厘，同時全球債息都創出高位，香港仲多埋新股推高拆息，對資產股唔係咁有利。
陸羽仁
金融High Tea 舊文
來源 source: http://hdfin.stheadline.com