智取大市：港股購物節殺到
■股市傳統年結季節將近來到。
雙11啱啱過咗，股市嘅傳統年結季節將近來到，講緊係11月底嘅對沖基金年結，以至12月外資基金嘅悠長假期。你可能話：「年年都有，有乜咁特別？」但其實喺唔同市況之下，呢項季節性因素會形成唔同意義。
根據過往經驗，如果喺11月下旬之
前，港股一直處於長線升浪，恒指由11月下旬至12月全個月就會進入「較安全期」，較差情況只係比較chok，出現升浪見頂轉角市可能相當低。原因係少有金融市場喺呢段時間少有重大活動同動作，突發嘢甚少發生，加上對沖基金年結同基金經理放假，少咗一班友沽嘢食糊。如今作風較保守嘅外資基金經理將會放假，大媽就馬照跑、股照炒，於是升市之中，短時間內剩番炒股較狼死嘅大媽可以興風作浪，食住近期個強勢，炒風延續至安全期完結嘅明年1月初，機會不低，其間港股就算有小調整，以上周一小奇蹟日經驗，下次小調整都可能快速收復失地。
手機設備股炒到癲曬，絕對唔係壞事，皆因佢哋為其他熱門板塊設立一個新高度，稍後有機會陸續轉強破頂。估計喺未來兩個月內，唔少熱門股會有額外兩成甚至更高嘅升幅。下一波，睇嚇恒大（3333）、融創（1918）份兒。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com